«Ուկրաինայի իրադարձություններն, անշուշտ ազդում են Հայաստանի վրա, քանի որ Ուկրաինայում շատ են հայերը ու հակամարտության առաջին օրվանից շատ էթնիկ հայեր են զոհվել այնտեղ»,- այսօր «Նովոստի» միջազգային մամուլի կենտրոնում կայացած «Անվտանգության արդիական մարտահրավերները ԱՊՀ տարածքում թեմայով Երեւան-Մոսկվա-Աստանա տեսակամրջի ժամանակ հայտարարեց քաղաքագետ Ալեքսանդր Իսկանդարյանը:
Քաղաքագետն իր խոսքում զուգահեռներ եւ համեմատականներ տանելով՝ նկատեց, որ Լեռնային Ղարաբաղի հակամարտությունը միակն է տարածաշրջանի հակամարտություններից, որտեղ երբեք չեն եղել խաղաղապահներ: «Խնդիրները հաղթահարում ենք մենք ինքներս` հայերն ու ղարաբաղցիները, միակ խնդիրը զենքի դիսբալանսն է: Այդ բալանսի խախտումն է, որ լուրջ խնդիրների կհանգեցնի մեր տարածաշրջանում, բայց այս խնդիրը արդեն տեղավորվում է մի շարք կազմակերպությունների, այդ թվում ՀԱՊԿ-ի գործառույթների մեջ»,- ասաց Ալեքսանդր Իսկանդարյանը:
Անդրադառնալով Ուկրաինայում իրավիճակի հաղթահարմանը, Ուկրաինայում, քաղաքագետն ասաց, որ որքան էլ Ուկրաինայի նախագահը խելամիտ գործի, նա միևնույն է չի կարողանա միայն ռազմական ճանապարհով լուծել խնդիրը: Եվ կանխատեսեց` գնալով իրավիճակն ավելի է լարվելու, Ուկրաինային սպասվում է տնտեսական կոլապս եւ լուրջ խնդիրներ բոլոր ոլորտներում:
«Պորոշենկոյի խաղաղության ծրագիրը նշանակում է միակողմանի ագրեսիա ՌԴ-ի դեմ: Եթե Ուկրաինայի իշխանությունները իսկապես ցանկություն ունենան խաղաղ բանակցելու եւ հարցը խաղաղ ճանապարհով լուծելու, ՌԴ-ն կգնա այդ քայլին»,-ուկրաինական իրադարձությունների առումով մեղքը միայն Ուկրաինայի վրա բարդեց ԱՊՀ երկրների Կովկասի ինստիտուտի բաժնի վարիչ Վլադիմիր Եվսեևը: Նա դրական բնութագրեց Հայաստանի դիրքորոշումը`ուկրաինական հարցում ՌԴ-ին պաշտպանելու համար:
Ի դեպ, հուլիսի 4-ին Աստանայում կայանալու է Անկախ պետությունների համագործակցության երկրների Պաշտպանության նախարարների խորհրդի նիստը։ Այսօրվա տեսակամրջի ժամանակ նախատեսվում էր քննարկման առարկա դարձնել հարցերը` ո՞ր մարտահրավերներն են այսօր առավել մեծ սպառնալիք հանդիսանում ԱՊՀ երկրների անվտանգության համար։ Միջին Ասիայի և Մեծ Կովկասի տարածաշրջաններում ինչպե՞ս նվազագույնի հասցնել արտաքին գործոնների հասցրած վնասը։ ԱՊՀ երկրներն ի՞նչ քայլեր պետք է ձեռնարկեն, որպեսզի թուլացնեն Ուկրաինայի տարածքում տիրող վիճակը, որը քաղաքացիական պատերազմի է վերածվել, իսկ Դոնեցկի և Լուգանսկի մարզերում մարդասիրական աղետ է սկսվել։
Կարդացեք նաև
Սակայն, բանախոսները կենտրոնացան միայն ռուս-ուկրաինական կոնֆլիկտի վրա:
Նելլի ԳՐԻԳՈՐՅԱՆ
