Նրանք կոչ են անում կանխել Իրաքում իրականացվող սպանդը
Այսօր՝ օգոստոսի 9-ին, «Պոստ Սկրիպտում» ակումբում Իրաքում եզդիների շուրջ ստեղծված իրավիճակին անդրադարձան եւ միջազգային կազմակերպություններին ու ՀՀ իշխանություններին եզդիական համայնքի պահանջը ներկայացրին «Սինջար եզդիների ազգային միավորում» հ/կ խորհրդի ղեկավար Բորիս Մուրազին և փոխնախագահ Մամե Ամիրյանը, «Եզդիների ազգային կոմիտե» հ/կ փոխնախագահ Սաշիկ Սուլթանյանը, «Միդիա-Շանգալ» եզդիների ազգային միավորում հ/կ-ի նախագահ Ամո Շարոյանը և հասարակական գործիչ, դասախոս Ռուստամ Բաքոյանը: Նրանք գերտերությունների ղեկավարներին ու միջազգային կազմակերպություններին կոչ են անում չբավարարվել մերկապարանոց հայտարարություններով եւ ստիպել ահաբեկիչներին՝ վերջն դնել ո՛չ մահմեդական փոքրամասնությունների սպանդին:
Ըստ «Միդիա-Շանգալ» եզդիներիազգայինմիավորում հ/կ նախագահ ԱմոՇարոյանի հայտարարության. «2014 թ օգոստոսի 2-ին «Իրաքի եւ Լեւանտայի իսլամական հանրապետություն» ահաբեկչական կազմակերպությունը գրավել է Իրաքի եզդիաբնակ Շանգալ մարզի մի մասը: Բնակչության մեծ մասը վախից լքել է իրենց բնակավայրը եւ բարձրացել լեռները: Ահաբեկիչները եզդիաբնակ բնակավայրերում գերեւարում եւ սպանում են իսլամ չընդունողներին… Մարդկանց սպանում են միայն այն պատճառով, որ չեն ընդունում իրենց կրոնը: Եզդիների հետ ահաբեկչության են ենթարկվում նաեւ այնտեղ ապրող քրիստոնյաները»:
Բորիս Մուրազիի ձեւակերպմամբ, այս օրերին Հայաստանի եզդիական համայնքը արդեն չորս-հինգ բողոքի ակցիա է իրականացրել, դիմել են ՀՀ նախագահին ու վարչապետին, որպեսզի դիվանագիտական ճանապարհով լուծում տան խնդրին: Նրա ասելով, ՀՀ կառավարությունից պատասխան չէին ստացել ու սպառնացել էին փակել Հանրապետության հրապարակը, դրանից հետո իրենց ընդունել է փոխվարչապետ Արմեն Գեւորգյանը:
Կարդացեք նաև
«ՀՀ կառավարությունը 50 000 դոլարի սահմաններում խոստացել է պարենային օգնություն տրամադրել եզդիներին, ինչը տեղափոխման հետ կապված դժվարություններ կարող է առաջացնել: Եթե ՀՀ կառավարությունը պատրաստ է այդ օգնությունը տրամադրել, կարող է ՄԱԿ-ի միջոցով փոխանցել Իրաքի գրասենյակին: Երեկ հանդիպել ենք նաեւ փոխարտգործնախարար Շավարշ Քոչարյանի հետ, շատ մեծ սպասելիքներ չունենք, թե ինչ-ինչ քայլեր կանի ԱԳՆ-ն, որովհետեւ անգամ Հայաստանի հետ կապված հարցերում է զգուշավոր: Փոխարտգործնախարարն ասաց, որ կքննարկեն դատապարտող հայտարարությամբ հանդես գալու հարցը»,-նշեց Մուրազին:
Նրա ասելով, երբ Ֆրանսիայի Հանրապետությունը խոսում է ընդհանուր քրիստոնյաների խնդիրներից, Իրանը՝ շիաներից, իրականում եզդի բնակչության խնդիրների մասին բոլորը լռում են:
Մամե Ամիրյանը թվային տվյալներ ներկայացրեց. 300 000 եզդի փախստական կա, 60 երեխա մահացել է սովից ու ծարավից, ոչ պաշտոնական տվյալներով զոհերի թիվը անցել է 5000-ը, 45 եզդի կանայք երեկ ինքնասպան են եղել դահճի ձեռքը չընկնելու համար, 10000 եզդի անցել է սիրիական Քրդստանի տարածքը, մի քանի եզդի գտնվում է Վրաստանում, մի քանիսն էլ՝ Թուրքիայում, 500 կանանց ահաբեկիչները գերեւարել եւ տարել են Մոսուլ:
Բանախոսները նշեցին, որ մշտական կապ են պահպանում իրենց հոգեւոր առաջնորդի՝ Բիր Հազըմ բեկի որդու եւ տեղական ԶԼՄ-ների հետ:
Ամո Շարոյանի խոսքով, ամեն ինչ սկսել է օգոստոսի երկուսին, պատճառն այն է, որ եզդիները այլադավ են, մահմեդականություն չեն ընդունում: Նրա խոսքով, կրկնվում է 1915 թ սցենարը. ինչ ժամանակին արել են հայերի հետ, հիմա էլ նույնը անում են եզդիների հետ. «Ջիհադի գաղափարախոսության սկզբունքներից ելնելով հայտարարել են, որ ով գոնե մեկ եզդի սպանի, կգնա դրախտ: Մարդկանց սպանում են միայն այն պատճառով, որ չեն ընդունում իրենց կրոնը: Ահաբեկիչները սպառնացել են պայթեցնել եզդիների Լալեշ սրբավայրը, նրանք արդեն պայթեցրել են քրիստոնյա փոքրամասնությունների մի քանի սրբավայրեր»:
Սաշիկ Սուլթանյանը նշեց, որ վերը նշված ահաբեկչական խմբավորումը Ալ-Քաիդայի հետնորդ է, նրա կազմում չեչեններ են, արաբներ, ադրբեջանցիներ, բոլորն էլ ծայրահեղ իսլամիստներ են, որոնք կոչ են անում գրավել ողջ մայրցամաքը: «Նրանք վտանգ են ներկայացնում ոչ աշխարհի համար: Իմիջիայլոց, Բարաք Օբաման էլ է դատապարտող հայտարարություն արել, բայց մեզ հայտարարություններ պետք չեն, մեզ պետք են գործողություններ: Միայն ՀՀ կառավարությունը որոշակի խոստումներ տվեց, չգիտենք ինչ չափով դրանք կիրականանան: Եզդիական համայնքի ներսում էլ դրամահավաք կկայանա, մեր որոշ հայ ընկերներ էլ պատրաստակամություն են հայտնել օգնություն տրամադրել»,-ասաց Սուլթանյանը:
Բացվել է հաշվեհամար ՎՏԲ-Հայաստան բանկում «Սինջար» եզդիական միավորում հասարակական կազմակերպության անունով, ցանկացողները կարող են գումար փոխանցել 16041030574400 հաշվեհամարին:
Գոհար ՀԱԿՈԲՅԱՆ
