Այսօր աշխատանքային այցով Սյունիքում գտնվող սպորտի եւ երիտասարդության հարցերի նախարար Գաբրիել Ղազարյանը Կապանում սպորտի ոլորտի ներկայացուցիչների հետ ունեցած հանդիպման ժամանակ նշեց, որ Սյունիքի մարզից սպորտի ոլորտում գրանցված արդյունքները գոհացնող չեն:
Սյունիքի մարզպետարանում անցկացված հանդիպման ժամանակ նախարարը մարզիչներին, սպրոտդպրոցների տնօրեններին առաջարկեց ավելի լավ աշխատել եւ ավելի բարձր արդյունքներ ապահովել: Վերջինս չհամաձայնեց մարզիչների այն հակադարձումներին, որ լավ արդյունքներ ապահովելու համար հիմնականում խոչընդոտ է հանդիսանում անհրաժեշտ պայմանների ու գույքի բացակայությունը` հավելելով, որ ավելի քիչ սպորատաձեւեր ունեցող այլ մարզերում նույն պայմաններում պարապող մարզիկների գրանցած արդյունքներն ավելի գոհացնող են: Սպորտի նախարարը, իհարկե, չմոռացավ եռացատկի մրցումներում Եվրոպայի չեմպիոն դարձած կապանցի թեթեւատլետ Լեւոն Աղասյանի ձեռքբերման մասին, ինչը հայ ազգի հպարտությունը համարեց, բայց նշեց, որ միայն մեկ սպորտաձեւով գրանցած հաջողությունը բավական չէ: Իսկ Սյունիքի մարզում 14 սպորտաձեւ կա այսօր:
Կարդացեք նաև
«Ավելի լուրջ պետք է մոտենալ գործին, ես ձեզ վստահեցնում եմ, եթե դուք ավելի լուրջ մոտենաք ձեր աշխատանքին, ես 100 տոկոս վստահ եմ, որ աշխատանքն իր արդյունքը կտա: Հայաստանը նոր-նոր է ոտքի կանգնում, եկեք օգնենք, եթե չօգնենք` առաջ չի գնալու գործը ոչ մի ոլորտում: Ոչինչ այսօր այս վիճակն է, վաղն ավելի լավ է լինելու: Ցավում եմ, որ այսօր Սյունիքի մարզում թույլ է դրած այդ հարցը, ես չեմ մեղադրում ձեզ, բայց խնդրում եմ լուրջ վերաբերվեք, մենք շատ թույլ արդյունքներ ենք գրանցում Սյունիքի մարզում, որ այդպես չպիտի լինի: Մենք նոր մտքեր ունենք, որ նախատեսում ենք սեպտեմբերից իրագործել», -առանց փակագծերը բացելու ասաց նախարարը եւ հավելեց, որ սպորտը մասսայականացնելու եւ այս ոլորտում առավել աշխուժություն մտցնելու համար պետք է լուրջ քայլեր արվեն: Սակայն նախարարի կարծիքին հակադարձողներ նույնպես եղան: Գեղարվեստական մարմնամարզության ոլորտում բազմամյա փորձ ունեցող մարզիչը չհամաձայնեց, որ մարզիչները լավ չեն աշխատում, արդյունքները գոհացնող չեն` հավելելով, որ նույնիսկ չջեռուցվող դահլիճում, ցածր աշխատավարձով, պարապելու սուղ պայմաններում շարունակում են նվիրված աշխատել, հաջողություններ գրանցել, բազմաթիվ մրցումների մասնակցել, միայն թե ֆինանսի բացակայության պատճառով` միջազգային մրցաշարերի մասնակցել չի հաջողվում:
Հանդիպմանը ներկա գտնվող սպորտի ոլորտի ներկայացուցիչները նախարարին դիմեցին տարբեր խնդիրներով` սպորտդպրոցի ջեռուցման, հատակի նորոգման, գույքի համալրման եւ այլ հարցերով: Կապանի Դավիթ Համբարձումյանի անվան սպորտդպորցի հատակը հիմնանորգման կարիք ունի: Իր չափսերով մարզադպրոցը լիովին համապատասխանում է քաղաքային եւ մարզային մրցումների անցկացման համար, սակայն հատակի անմխիթար վիճակի պատճառով այստեղ հնարավոր չի լինում միջոցառումներ կազմակերպել: Կապանի քաղաքապետարանի ներկայացուցչի խոսքով` համայնքի բյուջեն հնարավորություն չունի այն նորոգելու համար, նախագծանախահաշվային փաստաթղթերը կազմվել եւ ներկայացվել են տարբեր կազմակերպությունների, սակայն մինչեւ օրս արձագանքող չի եղել: Սպորտի եւ երիտասարդության հարցերի նախարար Գաբրիել Ղազարյանը նշեց, որ եկող տարի նախարարությունում կփորձեն աշխատանքներ տանել խնդրի լուծման ուղղությամբ: Անդրադառնալով դպրոցներում ֆիզկուլտուրա առարկայի կարեւորությանը` նախարարը իր դժգոհությունը հայտնեց առարկայի ոչ արդյունավետ կազմակերպումից, հավելելով, որ հանրապետությունում մատերի արանքով են նայում այդ առարկային: «Հայաստանում Ֆիզկուլտուրան ու սպորտը շատ ցավալի վիճակում են գտնվում », – նշեց պարոն Ղազարյանը:
Մերի ՍՈՂՈՄՈՆՅԱՆ
