Այսօր «Մեդիա կենտրոնում» հրավիրած ասուլիսում Մեծ Բրիտանիայի դեսպան Քեթի Լիչը գնահատական տվեց Շոտլանդիայի անկախության հանրաքվեին: Նրա խոսքերով՝ «Մեծ Բրիտանիան ճիշտ էր համարում ընդունել Շոտլանդիայի ազգային կուսակցության իրավունքը՝ հանրաքվե անցկացնել: Որոշվեց, որ քվեարկությունը պետք է լինի օրինական, արդար եւ որոշիչ: Այս սերնդի համար գոնե պիտի Շոտլանդիայի ցանկության խնդրին վերջակետ դնի: Հատուկ օրենք ընդունվեց, որը թույլ տվեց հանրաքվեն տեղի ունենա:
Քաջ հայտնի տվյալներն են, որ 55 տոկոսն ասաց ոչ, 45 տոկոսն ասաց՝ այո: Պարզից էլ պարզ էր, որ այդ քվեարկության արդյունքում Շոտլանդիան քվեարկեց՝ ունենալու ավելի հզոր պառլամենտ, որին պիտի նպաստեր Միացյալ թագավորությունը: Միասնականությանը կողմ երեք կուսակցությունները ստանձնեցին պարտավորություն, որ ավելի շատ իրավունքներ կտան Շոտլանդիայի պառլամենտին: Ինչպես նշեց մեր վարչապետը, այս քարոզարշավը նաեւ դժվարին մի պայքար էր, որը կրքեր էր բորբոքել: Մենք հպարտ էինք տեսնելու, թե Շոտլանդիայի ժողովուրդն ինչ ակտիվությամբ էր մասնակցում եւ այս մարտահրավերին դիմակայում»:
Նա ասաց, որ Շոտլանդիայի պարագայում կողմերն արդյունքն ընդունելու մեծ պատրաստակամություն ունեին եւ խաղաղ էին տրամադրված:
Հարցին՝ Շոտլանդիայի հանրաքվեն կարո՞ղ է հանդիսանալ նախադեպ՝ ինչպես ԼՂՀ-ի համար՝ դեսպանը պատասխանեց, որ յուրաքանչյուր դեպքում տարբեր մոտեցումներ կարող են լինել. «Առանցքային է, որպեսզի քաղաքական համաձայնություն լինի՝ արդյունքներն ընդունելու: Պետք է հանրաքվեին նախորդի խաղաղությունը»:
Կարդացեք նաև
Հարցին՝ Շոտլանդիան Սահմանադրություն չունի, բայց դա չի խանգարում ժողովրդավար լինելու, իսկ Հայաստանում այժմ Սերժ Սարգսյանը նախատեսում է սահմանադրական փոփոխություններ, որի դեմ Եռյակը պայքար է սկսում, Դուք ի՞նչ եք մտածում այդ փոփոխությունների մասին, արդյո՞ք դրանք Հայաստանն ավելի ժողովրդավար կդարձնեն, նա պատասխանեց. «Շոտլանդիայի հանրաքվեն ցույց տվեց, որ իրավաբանորեն կառավարել պետք չի, եթե փոխհամաձայնություն կա:
Փոփոխությունը, ցանկացած պարագայում, պետք է ընթանա քննարկումների, բանավեճերի միջոցով, որպեսզի հստակ հասկացվի, թե ինչ է դա իրենից ենթադրում: Վստահ եմ, որ ՀՀ սահմանադրական փոփոխությունները եւս կանցնեն հանրային քննարկումների փուլ»:
Հռիփսիմե ՋԵԲԵՋՅԱՆ
Լուսանկարը՝ «Մեդիա կենտրոն»-ի
