«Շրջանառության հարկի մասին» օրենքի դեմ բողոքի դուրս եկած գյումրեցի առևտրականներն այսօր Շիրակի մարզպետ Ֆելիքս Ցոլակյանի կաբինետից շարժվեցին դեպի ՀՀԿ-ական պատգամավոր Սուքիաս Ավետիսյանի գրասենյակ:
Պատգամավորին տեսնելուն պես` ցուցարարներն այնպես ոգևորվեցին, որ նրանցից ոմանք, պատգամավորի ազգանունը շփոթելով, պարոն Ավետիսյանի փոխարեն, պարոն Սուքիասյանով դիմեցին: «Էդ օրենքը որ ընդունեցիք, պարոն Սուքիասյան, էդ որի՞ս հարցրեցիք»:
Մեկ ուրիշն էլ հետաքրքրվեց. «Էդ օրենքը որ ընդունեցիք` բարեղճորե՞ն ընդունեցիք»: Պատգամավորը հետաքրքրվեց, թե բարեղճորենը ո՞րն է: Այդ պահին բողոքավորներից մեկն ամենայն հավականությամբ ինչ-որ վիրավորական արտահայտություն թույլ տվեց պատգամավորի հասցեին, որին Սուքիաս Ավետիսյանը հակադարձեց բավական կոպիտ ձևով: Միտինգավորներից մեկը նախազգուշացրեց պատգամավորին. «Մատ չթափ տաս, էդպես չխոսես»: Նրանք նոր օրենքը որակեցին «անխիղճ» օրենք ու հայտարարեցին, որ այն իրենց պատրաստվում է «քացու տակ գցել»:
Կարդացեք նաև
Ամբողջ ընթացքում բողոքավորները պնդում էին, որ դա դիկտատուրական օրենք է, պատգամավորն էլ փորձում էր պարզաբանել, որ իրականում այն լավ օրենք է, այլ հարց է, որ կա փաստաթղթավորման խնդիր: Ըստ պատգամավորի, այդ հարցը քննարկվում է ֆինանսների նախարարի հետ, որպեսզի փոքր ու միջին տնտեսվարողների մոտ ստուգումներ չանցկացնեն:
Բողոքավորների հարցերը տարբեր էին, մոտ 2 ժամ տևած հանդիպման ժամանակ ամեն մեկը իր ոլորտի հարցն էր բարձրացնում, բայց պատասխանը ստանալուց զայրույթով էին արձագանքում, բողոքում էին: «Մենք կհրաժարվենք ձեր գրած օրենքներից, դուք օրենք գրող չեք, դուք վնաս տվող եք»,-բացականչում էր մի կին: Կանանցից մեկն էլ անիծեց, թե գետինը մտնի էդ օրենքը գրողը:
Պատգամավորը բորբոքված առևտրականներն բացատրում էր, որ եթե երկիրը հիմնված է խոշոր տնտեսավարողների վրա, ապա այն փլուզման եզրին է, այդ պատճառով էլ պիտի կռիվ տալ խոշոր ձեռնարկատերերի դեմ, արտոնություններ տրվեն փոքր ու միջին տնտեսավարողներին, սակայն դրա համար անհրաժեշտ է հաշվառել նրանց:
Ի պատասխան այս ամենի, առևտրականները նեղսրտում էին, թե այսքան ժամանակ գյումրեցի պատգամավորները ի՞նչ մի լավ բան են արել ժողովրդի համար: «Ի՞նչ վատ բան են արել», -հարցնում էր Սուքիաս Ավետիսյանը: «Դուք մեզ կլպում եք, կլուծարվինք, դուք կերեք, կշտացեք»,-գոռում էր նրանցից մեկը:
Առևտրականներից մեկը պատգամավորին նախազգուշացրեց, որ եթե ուզում են Գյումրին չդատարակվի, պիտի ազատություն տան փոքր բիզնեսին: Կողքից մի կին միջամտում էր`պատգամավորին ասելով. «Դուք թասիբ չունիք, էդպես կենեք, որ հայը գնում է թուրքի մոտ աշխատելու»: Պատգամավորը, հատ-հատ պատասխանելով յուրաքանչյուրի հարցադրմանը, շարունակում էր պնդել, թե այն լավ օրենք է: Այլ հարց է, որ քննարկումների որոշակի թեմաներ կան:
Բողոքավորներից շատերը, հիասթափված պատգամավորի պատասխաններից, լքեցին ՀՀԿ գրասենյակի բակը, մի քանիսը Սուքիաս Ավետիսյանի հրավերքով ներս մտան գրասենյակ քննարկման թեման շարունակելու: Վաղը շարունակվելու է բողոքի ակցիան, սակայն այն տեղի է ունենալու Շիրակի մարզի հարկայինի դիմաց: Օրենքը չվերանայելու դեպքում գործարարները սպառնացին լուծարել իրենց գրանցված բիզնեսը:
Նունե ԱՐԵՎՇԱՏՅԱՆ
