Տնտեսական մրցակցության պետական պաշտպանության հանձնաժողովի նախագահ Արտակ Շաբոյանն այսօր լրագրողների հետ զրույցում պատասխանելով այն հարցին, թե ինչ ազդեցություն կարող է ունենալ դրամի արժեզրկումը գնաճի վրա, պատասխանեց, որ հանձնաժողովը պարբերաբար դիտանցումներ է իրականացնում այն ապրանքային շուկաներում, որտեղ կան խոշոր տնտեսվարողներ՝ թույլ չտալու նրանց իրականացնել գնային չարաշահումներ:
«Վերջին դիտանցումն իրականացրել ենք նոյեմբերի 26-ին, որի ժամանակ պարզել ենք, որ տեղի են ունեցել գնային բարձրացումներ, դրանք հիմնականում ներմուծված ապրանքների դեպքում էին: Երբ գնային բարձրացումները համեմատում ենք դրամի փոխարժեքի հետ, ապա տեսնում ենք, որ գնային բարձրացումները համահունչ են: Այս պահի դրությամբ մեր մասնագետները ուսումնասիրություններ եւ գնագոյացման հաշվարկներ են իրականացնում»:
Հանձնաժողովի նախագահը ներկայացրեց, որ թանկացումները եղել են հիմնականում շաքարավազի, կարագի, ձեթի, ալյուրի, ոսպի շուկայում:
Պրն Շաբոյանը նշեց, որ կաթնամթերքի գծով գնային փոփոխություններ տեղի չեն ունեցել: Լրագրողների դիտարկմանը, որ «Աշտարակ Կաթ» ընկերությունն արդեն թանկացրել է իր կաթնամթերքը, չնայած նրան, որ գյուղացիները նշում են, որ նույն գնով են կաթը տալիս, պրն Շաբոյանը պատասխանեց, որ ուսումնասիրություն կիրականացնեն այդ ուղղությամբ. «Եթե կլինեն գնային փոփոխություններ, ապա կիրականացնենք ուսումնասիրություն»:
Կարդացեք նաև
Բենզինի շուկայում, ըստ պրն Շաբոյանի, գները նույնպես սկսել են նվազել օգոստոս ամսից. «Վաճառքի եւ ձեռքբերման գները նվազել են 5-6 տոկոսով»:
Էլյա ՀՈՎՀԱՆՆԻՍՅԱՆ
