«Մենք՝ որպես ազատական ուժ, չենք ընդունում Հայաստանի՝ Եվրասիական տնտեսական միությանն անդամակցելու գործընթացը»,- այսօր՝ դեկտեմբերի 2-ին, «Հայելի» մամլո ակումբում լրագրողների հետ հանդիպման ընթացքում հայտարարեց ՀՀՇ կուսակցության նախագահ Արարատ Զուրաբյանը:
Նա նշեց, որ կուսակցությունը բացասական է գնահատում այդ գործընթացը՝ հաշվի առնելով, որ Հայաստանը անդամակցում է մի միության, որը դեռ չստեղծված լուրջ խնդիրներ ունի. «Այսօր ամբողջ քաղաքակիրթ աշխարհը պատժամիջոցներ է կիրառում Ռուսաստանի դեմ, այսօր Ռուսաստանի տնտեսությունը օր օրի թուլանում է եւ բացառված չէ, որ այն կփլուզվի: Ռուս տնտեսագետները եւ քաղաքական գործիչներն են հայտարարում, որ եթե նավթի գների անկումը շարունակվի, ապա Ռուսաստանին ռեցեսիա է սպասվում: Հիմա Հայաստանը հուժկու քայլերով վազում է դեպի Ռուսաստանի ռեցեսիա: Հավանաբար, հաճույք է պատճառում Հայաստանը անպայման մտցնել այդպիսի ճգնաժամային վիճակի մեջ գտնվող միություն եւ հաճույք ստանալ նրանից, որ մենք բարեկամներ ենք, մենք համատեղ գործելու ենք դարեր շարունակ եւ մեր ծանրությունը իրար հետ պետք է տանենք»:
Պարոն Զուրաբյանն ասաց, որ թե՛ ընդդիմությունը եւ թե՛ իշխանությունը Ռուսաստանի իշխանությունների նկատմամբ ռեւերանսներ գործելու համար պատրաստ են Հայաստանը տանել կործանման. «Ես սա համարում եմ կործանման սկիզբ: Ցավոք սրտի միշտ պետք է հաշվի առնել յուրաքանչյուր զարգացման սցենար, իսկ զարգացման այն սցենարի պարագայում, որ առաջիկա Ռուսաստանին է սպասվում, մենք շատ բարդ իրավիճակում ենք հայտնվելու»:
Արարատ Զուրաբյանը նկատեց, որ ԵՏՄ-ում առեւտուրը իրականանալու է հիմնականում ռուբլով, սակայն նա չի տեսնում, որ Հայաստանում ինչ որ մեկը այդ հարցի շուրջ որեւէ մտահոգություն արտահայտի. «Քանի դեռ Հայաստանում իշխանությունը ձեւավորվելու է այն սցենարով, որով ձեւավորվել է տարիներ շարունակ, քանի դեռ Հայաստանում իշխանությունը իր շահն է տեսնում, մենք ունենալու ենք այս իրավիճակը»:
Կարդացեք նաև
Ամի ՉԻՉԱԿՅԱՆ
