«Օբամայի վարչակարգը 2014 թվականի ընթացքում խնդիրների պակաս չի ունեցել»,- այսօր` դեկտեմբերի 22-ին, «Հայելի» մամլո ակումբում լրագրողների հետ հանդիպման ընթացքում հայտարարեց «Հայացք» կիրառական քաղաքագիտության եւ հետազոտությունների վերլուծության կենտրոնի վերլուծաբան Լիանա Հովհաննիսյանը:
Նրա խոսքերով` Իսլամական պետության դեմ ԱՄՆ-ի որդեգրած քաղաքականությունը չափավոր էր, քանի որ ԱՄՆ-ն, չցանկանալով միայնակ Իսլամական պետության հետ պայքարի մեջ մտնել, նախընտրել է կոալիցիա կազմել եվրոպական եւ արաբական երկրների հետ միասին. «Անգամ այս կոալիցիայի կազմում նրանց ռազմավարությունը չափավոր էր, որովհետեւ նրանք նախընտրեցին օդային հարվածներ հասցնել` շատ լավ գիտակցելով, որ եթե չկա այնտեղ ցամաքային ուժ, որը կկարողանա ուղղորդել այդ հատվածները, նրանց պայքարը չէր կարող լիներ այնքան արդյունավետ, որքան նրանք ցանկանում են: Երեւի թե սա է պատճառը, որ մենք թեւակոխում ենք 2015 թվական, եւ դրա հետ մեկտեղ այս մարտահրավերը դեռեւս չեզոքացված չէ: ԱՄՆ-ն ստիպված կլինի 2015 թվականին նույնպես որոշակի քայլեր կատարել»:
Անդրադառնալով ուկրաինական ճգնաժամին` վերլուծաբանը նշեց, որ այդ դեպքում Օբամայի վարչակազմի քաղաքականությունը չափավոր չէր. «Դա կարելի է ԱՄՆ-ի կողմից արկածախնդրություն կամ միամտություն համարել, որովհետեւ դժվար է պատկերացնել, որ ԱՄՆ-ն եւ իր եվրոպացի գործընկերները չէին պատկերացնում, որ Ուկրաինան Ռուսաստանի համար այն կարմիր գիծն է, որից ներքեւ պատրաստ չի լինելու զիջումների գնալ: Այդքանից հետո Ռուսաստանի հետ մտնել ուղիղ առճակատման Ուկրաինայի համար` առանց հաշվի առնելու բոլոր բացասական հետեւանքները, որոնց ականատես ենք լինում, կարելի է արկածախնդրություն համարել»:
Լիանա Հովհաննիսյանը, խոսելով Հայաստան-ԱՄՆ հարաբերությունների մասին, ասաց, որ չնայած այն հանգամանքին, որ Հայաստանն անդամակցում է Եվրասիական տնտեսական միությանը, ԱՄՆ-ն դեռ հետաքրքրված է շարունակել Հայաստանի հետ հարաբերությունները: Ըստ վերլուծաբանի` այդ մասին փաստում է ԱՄՆ նախկին դեսպան Ջոն Հեֆերնի հայտարարությունը, թե ԱՄՆ-ն հետաքրքրված է Հայաստանի հետ համագործակցմամբ:
Կարդացեք նաև
Ամի ՉԻՉԱԿՅԱՆ
