Եվրոպայի խաղերը առաջին անգամ ընդունելուց առաջ սպառնալիքները, ֆիզիկական բռնությունները եւ կառավարությանը քննադատողների ձերբակալությունները դարձել են Ադրբեջանի ռեժիմի այցեքարտը: Այս մասին հայտնում է «Armensty International» իրավապաշտպան կազմակերպությունը խաղերից 100 օր առաջ, այսօր տարածված նոր զեկույցում:
«Իրավունքների պաշտպանության մեղավորություն. Ադրբեջանի մարդու իրավունքների պաշտպանները եւ ակտիվիստները ճաղերի հետեւում» անունով զեկույցում ամփոփված են կառավարության քննադատների եւ իրավաբանների հետապնդման, կեղծ մեղադրանքներով ձերբակալման, ծեծելու, սպառնալու, անհրաժեշտ բուժօգնությունից զրկելու դեպքերը:
«Amnesty International»-ի Եվրոպայի եւ Կենտրոնական Ասիայի հարցերով տնօրեն Ջոն Դալհուիսենը ասում է. «Ոչ ոք չպետք է խաբվի այն հմայիչ ու գրավիչ միջազգային շոուից, որը Ադրբեջանը կազմակերպում է, որպեսզի միջազգային հեղինակություն ձեռքբերի եւ արտասահմանյան գործարարների ուշադրությունը գրավի: Այդ երկրի իշխանությունները ամենառեպրեսիվն են Եվրոպայում եւ, եթե ակտիվիստներին ու իրավունքների պաշտպաններին ձերբակալելու համար մրցանակներ լինեին, Ադրբեջանը կլիներ առաջին տեղերից մեկում»:
Իրավապաշտպան կազմակերպությունը անդրադարձել է Ադրբեջանի բանտերում գտնվող այն մարդկանց, որոնց կեղծ մեղադրանքներ են առաջադրվել: Զեկույցում տեղ են գտել մարդու իրավունքների պաշտպանների, լրագրողների եւ Ադրբեջանի իշխանությունների գործելաոճը քննադատող 90-ից ավելի անձանց ճնշումների ենթարկելու մասին իրավապաշտպանների հայտարարությունները: «Այս վերջին ձերբակալությունները արդյունավետ կերպով կաթվածահարել են երկրի քաղաքացիական հասարակությունը եւ սահմանափակել են խոսքի ազատությունը»,- ասում է Ջոն Դալհուիսենը:
Կարդացեք նաև
«Amnesty International» հատուկ առանձնացրել է ադրբեջանցի 60-ամյա իրավապաշտպան Լեյլա Յունուսի, լրագրող Խադիջա Իսմայլովայի եւ այլ անձանց ձերբակալությունները:
Վերջում իրավապաշտպան կազմակերպությունը Ադրբեջանի իշխանություններին կոչ է արել անհապաղ եւ անվերապահորեն ազատ արձակել բոլոր բանտարկյալներին եւ լիարժեք ու անաչառ քննել պետական ու ոչ պետական գործիչներին հասցեագրվող մեղադրանքները: Կազմակերպությունը նաեւ կոչ է արել երկրի իշխանություններին դադարեցնել իրենց կարծիքները արտահայտողների նկատմամբ սպառնալիքները եւ քրեական հետապնդումները:
Պատրաստեց Աշոտ ԻՍՐԱԵԼՅԱՆԸ
