Հարցազրույց Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության մեջ մեղադրվող Գնել Թևոսյանի պաշտպան Արա Զաքարյանի (լուսանկարում) հետ:
– Պարոն Զաքարյան, լրատվամիջոցներին հայտնել էիք, որ Ձեր պաշտպանյալի նկատմամբ ևս քննության համար խորթ միջոցներ են կիրառվել։ Ի՞նչ միջոցների մասին է խոսքը, և արդյոք նրա հետ կապված գործողություններ պատրաստվո՞ւմ եք ձեռնարկել։
– Դրա վերաբերյալ հաղորդում տրվել է։ Ասեմ, որ Գնել Թևոսյանին հարվածներ են հասցրել, արժանապատվությունը նվաստացրել, հայհոյանքներ տվել, որի մասին Գնել Թևոսյանը հաղորդման և բացատրության մեջ նշել է։
– Հաղորդումը Հատուկ քննչական ծառայությո՞ւն է ներկայացվել։
Կարդացեք նաև
– Ոչ, այն մարմնին, որը քննություն էր կատարում։ Եկան, նաև հաղորդում վերցրեցին, դրանից հետո արդեն պետք է փոխանցվի Հատուկ քննչական ծառայություն, որ այնտեղից գան և այդ հանգամանքների շուրջ քննություն կատարեն։ Բայց մինչ այժմ որևիցե տեղեկություն չկա։ Չեն եկել, չեն հարցաքննել։
– Դուք նշել էիք, որ Ձեր պաշտպանյալը չի ընդունում առաջադրված մեղադրանքը։ Ձեր պաշտպանյալը ցուցմունք տվե՞լ է, հայտնե՞լ է, թե ինչ է արել դեպքի օրը, արդյոք արթո՞ւն է եղել, թե՞ ոչ։
– Հետևյալն է, որ արթուն չի եղել, քնած է եղել, դեպքի մասին իմացել է հաջորդ օրն առավոտյան, ինչպես բոլոր մնացած կուրսանտները։
– Եթե Ձեր պաշտպանյալը նշում է, որ քնած է եղել, ինչո՞վ է Ձեզ համար բացատրվում այն հանգամանքը, որ նա այժմ մեղադրվում է սպանության մեջ։
– Այս պահին ինֆորմացիայի բացակայության պայմաններում շատ դժվար է ասել։ Չեմ բացառում, որ ինչպես՝ Գնել Թևոսյանի, այնպես էլ՝ այլ կուրսանտների նկատմամբ ևս խորթ մեթոդներ կիրառված լինեն, որոնց արդյունքում ինչ-որ անձ կամ անձինք իմ պաշտպանյալի դեմ ցուցմունքներ հարկադրված լինեն տալու։ Որևէ այլ բացատրություն այս պահի դրությամբ չունեմ:
Օֆելյա ՀՈՎՀԱՆՆԻՍՅԱՆ
Հոդվածն ամբողջությամբ կարող եք կարդալ «168 ժամ» թերթի այսօրվա համարում