«Եթե չեք վստահում դատարաններին, այսօր այդ դատարանն ամբողջությամբ այս կամ այն կողմի օգտին հարցը լուծում է, հիմա երբ ասում են տանք հաշտարարի ինստիտուտին, դատարանը միայն հաստատի հաշտությունը, ասում եք՝ չէ: Ինչի՞ չէ»,- այսօր ՀԱԿ խմբակցության պատգամավոր Գագիկ Ջհանգիրյանն այսպես հանդիմանեց ոչ իշխանական ուժերին, որոնք դեմ արտահայտվեցին դատարաններում հաշտարարի ինստիտուտի ձեւավորմանը:
Հիշեցնենք, որ ԱԺ-ում քննարկվում է կառավարության նոր նախագիծը՝ Քաղաքացիական դատավարության օրենսգրքում փոփոխություններ եւ լրացումներ կատարելու մասին:
Ոչ իշխանական ուժերի պատգամավորները քննադատում էին՝ ասելով, որ կողմերին հաշտեցնելու համար բարեկամներ կան, իմաստուն մարդիկ կան, ի վերջո թաղային հեղինակություններ կան: Ըստ Գագիկ Ջհանգիրյանի. «Հավատացեք, թաղային հեղինակությանը արդեն դիմել են, եթե հասել են դատարան: Ուրեմն իրենց գերդաստանի ավագը արդեն այդ գործով միջամտել է, չեն հաշտվել, հասել են դատարան: Հիմա դուք սրան դեմ եք, ես չեմ հասկանում: Սա միանշանակ դրական ինստիտուտ է: Հաշտության ինստիտուտը արդեն մտցնելու ենք քրեական դատավարության մեջ: Դատարանը պետք է հաստատի հաշտությունները, եթե կողմերը եկել են ընդհանուր հայտարարի: Սա նպատակ ունի բեռնաթափել դատարանը: Հիմա դատարանն է սիրուն դնում շխկացնում, հա գնա բողոքի: Տեսեք քանի՞ վերաքննիչ բողոք է անցել, վճռաբեկ քանի՞ բողոք է անցել՝ ոչ մի: Ներքեւից վերեւ համաձայնեցված գնում են»:
Ըստ Գագիկ Ջհանգիրյանի, պետք է ուշադրություն դարձնել, որ այնպիսի իրավիճակ չլինի, որ ամեն դատավոր ունենա իր 5 հաշտարարները, մեկը մյուսին «պաս» տան, հաշտություն կնքեն. «Հաշտարարների բաշխումը դատավորների միջեւ պետք է ավտոմատ համակարգով լինի կամ այբբենական կարգով: Այնպես չլինի, որ այս 5 հաշտարարները այս դատավորինն են միայն»:
Կարդացեք նաև
Գագիկ Ջհանգիրյանը ուշադրություն հրավիրեց նաեւ մեկ այլ հանգամանքի վրա: Քանի որ դատավորները 65 տարեկանից գնում են թոշակի, հիմա էլ կյանքի տեւողությունը աճել է, մեծացել է, չեն ուզում 65 տարեկանից գնան թոռնիկներին պահեն, ուզում են 75-ից գնան. «Ստացվում է, որ մենք օրենք ենք ընդունում մենակ դատավորների մասին: Կառավարությունը կասի՝ չէ, լիցենզիոն կարգ եմ սահմանել, բոլորն էլ կարող են մասնակցել: Բայց ասենք ես եմ ու արդարադատության նախարարն է, մի հատ ընենց բարդ քննություն ու թեստ եմ նախատեսում, որ Սողոմոն իմաստունն էլ չի անցնում: Մնում են այդ դատավորները: Ըհը, եղավ, իրենց համար լրացուցիչ եկամտի աղբյուր են ապահովում»:
Հռիփսիմե ՋԵԲԵՋՅԱՆ
