Կամերային երգչախմբի համերգին «ասեղ գցելու տեղ» չի եղել

Տնօրեն Արմեն Արաբյանի ասելով, 1400 տեղանոց դահլիճը լեփ-լեցուն է եղել,
իսկ որոշ ունկնդիրներ չեն կարողացել ներս մտնել

Ապրիլի 24-ին Շվեյցարիայի մայրաքաղաք Բեռնի Մյունստեր տաճարում տեղի է ունեցել հուշ-երեկո՝ նվիրված Հայոց ցեղասպանության 100 -րդ տարելիցին։ Ինչպես «Առավոտի» հետ զրույցում նշեց Հայաստանի պետական կամերային երգչախմբի տնօրեն Արմեն Արաբյանը, միջոցառման ժամանակ պաշտոնական ճառերով հանդես են եկել տարբեր ազգերի ներկայացուցիչներ, իսկ Գուսան վարդապետ Ալճանեանը, Շնորհք քահանա Չեքիճեանը կատարել են եկեղեցական արարողություն: Վիբկե Ցոլլման կարդացել է Սեւակի, Վարուժանի, Սիամանթոյի երկերից հատվածներ, կատարվել է Դավիթ Հալաճյանի Missa de Lumine (Պատարագ Լուսո) ստեղծագործությունը՝ Հայաստանի պետական կամերային երգչախմբի, Բեռնի Կամերային նվագախմբի, «Արդենտ» երգչախմբի, Մյունխենբուխսեյի մանկական երգչախմբի կատարմամբ։ Missa de Lumine-ն միջնադարյան լադի վրա է կառուցված: Նվագախմբերը ղեկավարել են Ռոբերտ Մլքեյանը, Պետեր Սիգվարդը, Պատրիկ Սեկկիարին, Սուզաննե Գռոսսենբախերը։ Մեներգիչներն էին Քրիստիանե Բոեսիգերը (սոպրանո), Արամ Օհանյանը (բարիտոն):

Արմեն Արաբյանը պատմում է, որ Missa de Lumine ստեղծագործությունը մեծ ոգեւորությամբ է ընդունվել ներկաների կողմից՝ մոտ 1400 տեղանոց դահլիճն ուղղակի լեփ-լեցուն է եղել, շատերը ստիպված ոտքի վրա են ուկնդրել, իսկ հարյուրավոր ունկնդիրներ մնացել են դրսում՝ տաճարում տեղ չլինելու պատճառով։ Եվրոպայում կայացած համերգ-արարողությունը հեռարձակվել է տարբեր երկրներում:

Հայաստանի կամերային երգչախմբի տնօրենն ասում է, որ Մյունստեր տաճարի հարեւանությամբ գտնվող Մյունստեր հրապարակում նաեւ շատ մեծ բողոքի ցույց է տեղի ունեցել, որին մասնակցել են ոչ միայն հայեր, այլեւ ասորիներ, հույներ, անգամ թուրքեր: Իսկ տաճարի ներսում Հայոց ցեղասպանության 100-րդ տարելիցի առիթով ելույթներ են ունեցել Բեռնի քաղաքապետը, պատգամավորներ, հոգեւորականներ: Հաջորդ օրը համերգ է տեղի ունեցել նաեւ Ցյուրիխի տաճարներից մեկում, Կամերային երգչախումբը հնչեցրել է Կոմիտասի հոգեւոր եւ աշխարհիկ խմբերգերը: «Երաժիշտները նվիրյալ ձեւով գնացին, որովհետեւ պայմաններն այն չէին, բայց քանի որ ապրիլի 24-ի հիշատակման առիթով էին մեկնել, համաձայնեցին»,- ասում է պարոն Արաբյանը, ու փաստում, որ ընդունող կողմը՝ հայ-շվեյցարական ընկերակցությունը չէր կարողացել պատշաճ պայմաններ ապահովել երաժիշտների համար:

Կարդացեք նաև

Արմեն Արաբյան. «Հումորից զուրկ մարդը վտանգավոր է հասարակության համար»

• 23:00 29.08.2019

Կամերային երգչախմբի տնօրեն. «Մեր կատարմամբ Վիվալդիի «Գլորիայի» տեսահոլովակը 6,5 մլն դիտում ունի, սակայն ոչ ոք չի խոսում սրա մասին» (Տեսանյութ)

• 13:25 21.02.2017

Կամերային երգչախմբի տնօրեն. «Հռոմի պապը հատուկ շնորհակալություն է հայտնել»

• 22:15 28.06.2016

ԳՈՀԱՐ ՀԱԿՈԲՅԱՆ

«Առավոտ» օրաթերթ
01.05.2015