«Մեր ունեցած տեղեկությունների համաձայն, Սիրիայում հայ բնակչության համար ստեղծվել է շատ ծանր վիճակ, մոտ 25-30 հազար հայ կանգնած է ոչնչացման եզրին՝ մարտական գործողությունների պատճառով»,- այսօր ԱԺ արտահերթ նիստում ՀԱԿ խմբակցության ղեկավար Լեւոն Զուրաբյանն այսպիսի հայտարարություն արեց եւ առաջարկեց Գալուստ Սահակյանին, որ խմբակցություններին հրավիրի իր մոտ՝ քննարկելու, թե ինչ քայլեր կարող են անել՝ օգնելու համար:
ԲՀԿ ղեկավար Նաիրա Զոհրաբյանն էլ հայտարարություն արեց ԲՀԿ անդամ, նախկին պատգամավոր Գոհար Ենոքյանի ձերբակալության մասին:
Նրա խոսքերով՝ «Մենք չենք կարող ձեւ անել, թե որեւէ բան երեկ տեղի չի ունեցել: Երեկ ձերբակալվել է ԱԺ նախկին պատգամավոր, ԳԽ նախկին պատգամավոր 73-ամյա Գոհար Ենոքյանը, որի հանդեպ խափանման միջոց ընտրվել է կալանքը: Ես երեկ եղել եմ Էրեբունու ոստիկանության նախնական կալանքի վայրում, վստահեցնում եմ, որ տիկին Ենոքյանի առողջությունը ծայրահեղ վատ է»:
Կարդացեք նաև
Նա առաջարկեց իր գործընկերներին միանալ եւ ստորագրահավաք անել՝ խափանման միջոցը փոխելու համար. «Րոպե առաջ 73-ամյա, առողջական շատ վատ վիճակում գտնվող Գոհար Ենոքյանի խափանման միջոցը պետք է փոխվի: Վստահ եմ, որ նա ազատության մեջ գտնվելով՝ հանրային որեւէ վտանգ չի ներկայացնի մեր փառահեղ արդարադատության համար՝ իրենց արդարադատ վճիռը կայացնելու»:
Գալուստ Սահակյանը լսեց հայտարարությունը եւ անցավ օրակարգին՝ առանց արձագանքելու:
Հռիփսիմե ՋԵԲԵՋՅԱՆ
