Այսօր«Մեդիա կենտրոնում» «Երեխաների իրավունքների պաշտպանությունը մարզերում» թեմայով քննարկմանը փորձագետները մտահոգություն հայտնեցին, որ մարզերում երեխաների իրավունքների պաշտպանության հարցերով գոյություն ունեն մի շարք խնդիրներ: Մասնավորապես մտահոգություն հայտնեցին երեխաների առքուվաճառքի, ապօրինի որդեգրման, անուշադրության մատնելու երևույթներին: Հատկապես կարևորվեց այս խնդիրների լուծման հարցում սոցիալական աշխատողների դերակատարությունը:
Արմավիրի զարգացման կենտրոնի ղեկավար Նաիրա Առաքելյանը նշեց. «Խնամակալության ու հոգաբարձուների խորհուրդների գործունեությունը գյուղական համայնքներում անարդյունավետ է: Խորհուրդները գործում են հասարակական կարգով և այնտեղ աշխատում են ոչ պրոֆեսիոնալներ»:
Տիկին Առաքելյանն առաջարկեց, որ համայնքային բյուջեից որոշակի տոկոս հատկացվի համայնքներում սոցիալական աշխատողի հաստիք ունենալու համար: Նաիրա Առաքելյանը մտահոգություն հայտնեց, որ մի շարք համայնքներում չեն գործում ցերեկային կենտրոններ, այդ պատճառով երեխաները մատնվում են անուշադրության:
Գյումրիի «Խորան Արդ» ինտելեկտուալ կենտրոնի համակարգող Արմեն Պետրոսյանը փաստեց, թե բավականին լուրջ խնդիրներ կան սահմանամերձ և լեռնային շրջաններում. «Ցանկացած իրավախախտում այստեղ հնարավոր է՝ սկսած ծննդյան վկայականների բացակայությունից, երեխաների՝ կրթությունից դուրս մնալուց և այլն: Երազգաորսում դեպք էր գրանցվել, երբ հայրություն չէր ճանաչել, երեխաները ծննդյան վկայական չունեին, չորս տարեկան երեխա էր, բայց հոդաբաշխ խոսք չուներ»:
Կարդացեք նաև
Արմավիրի մարզպետարանի աշխատակազմի՝ ընտանիքի, կանանց և երեխաների իրավունքների պաշտպանության բաժնի պետ Ասթինե Ապիտոնյանը հայտնեց, որ Արմավիրի միայն 4 խոշոր համայնքների բյուջեներն են հատկացրել ռեսուրսներ երեխաների համար ցերեկային կենտրոններ բացելու համար. «Ցավոք, ռեսուրսները քիչ են»:
ՀՀ Աշխատանքի և Սոցիալական հարցերի նախարարության ընտանիքի, կանանց և երեխաների հիմնահարցերի վարչության, երեխաների հիմնահարցերի բաժնի պետ Լենա Հայրապետյանը նշեց, որ բարեփոխումների փուլում են գտնվում ու մինչև 2018-ը բարեփոխումների ծրագրի շրջանակներում անդրադարձ կկատարվի երեխաների պաշտպանության վերաբերյալ բոլոր իրավական ակտերին: Այնուհետև ճշտում արեց, թե երեխաների ապօրինի որդեգրման մասին պետք չէ խոսել քանի դեռ չկա դատարանի որոշում:
Դառնալով սոցիալական աշխատողի անհրաժեշտությանը՝ տիկին Հայրապետյանը նշեց. «Կզարգանա սոցիալական աշխատողի ինստիտուտը: Սոցիալական աշխատողը պետք է աշխատանք տանի ընտանիքի անդամների հետ, նրա աշխատանքի արդյունքում երեխաների դեմ բռնությունները կնվազեն»:
Տաթև ՀԱՐՈՒԹՅՈՒՆՅԱՆ
Լուսանկարը՝ Մեդիա կենտրոնի:
