Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Գագիկ Պողոսյանի գլխավորությամբ հունիսի 1-ին շարունակվում էր «Վերնիսաժի գործով» դատական նիստը:
Ամբաստանյալ Վալերիկ Հովհաննիսյանի պաշտպան Արայիկ Ալվանդյանը դատական նիստի ընթացքում միջնորդություն ներկայացրեց Վալերիկ Հովհաննիսյանի նկատմամբ նշանակված խափանման միջոց կալանքը փոխարինել գրավով: Նա հայտարարեց, որ Վալերիկ Հովհաննիսյանի ծնողները պատրաստ են գրավը վճարել: Փաստաբանը դատարանին ներկայացրեց իր պաշտպանյալի առողջության մասին փաստաթուղթ. «Հարգելի՛ դատարան, հաշվի առնելով, որ իմ պաշտպանյալը ծանր վիրահատություն է կրել, հետվիրահատական խնամք եւ ուժեղացված սննդի կարիք ունի, որը քննչական մեկուսարանում դժվար կլինի իրականացնել: Բացի այդ վիրահատության ընթացքում իմ պաշտպանյալի նկատմամբ ուժեղացված ռեժիմ էր իրականացվել, որեւէ խնդիր չի առաջացել, հակառակ դեպքում՝ դրա արձագանքը կլսեինք»:
Նա հավելեց, որ Վալերիկ Հովհաննիսյանի հայրը՝ Սամվել Հովհաննիսյանը, երկրորդ կարգի պաշտպանյալ է, եւ ընտանիքի միակ կերակրողը Վալերիկ Հովհաննիսյանն է: Նա դատարանին ներկայացրեց նաեւ Սամվել Հովհաննիսյանի առողջության վերաբերյալ փաստաթուղթ:
Դատավորը հայտարարեց, որ այդ փաստաթուղթը բավարար չէ հիմնավորելու համար, որ ընտանիքի միակ կերակրողն ամբաստանյալ Հովհաննիսյանն է: Իսկ մեղադրող Հարություն Սարգսյանը առարկեց, քանի որ ըստ նրա չեն վերացել Վալերիկ Հովհաննիսյանին կալանքի տակ պահելու հիմքերը եւ վտանգավորության աստիճանը մեծ է:
Կարդացեք նաև
Մեղադրողի խոսքի ընթացքում բորբոքվեց ինքը՝ Սամվել Հովհաննիսյանը. «Բայց ո՞վ էր տարել մեքենան: Բառերդ չափավորե՛ք»: Վերջինիս դահլիճից դուրս հանեցին, իսկ դատավոր Գագիկ Պողոսյանն ասաց. «Դատելով կենսաթոշակի վկայականում առկա լուսանկարից պետք է եզրակացնել, որ այս ակտիվ տղամարդը երկրորդ խմբի հաշմանդամ Սամվել Հովհաննիսյանն էր»:
Դատավորը գնաց խորհրդակցական սենյակ որոշում կայացնելու:
Ամի ՉԻՉԱԿՅԱՆ
