ԱՄՆ Պետդեպարտամենտի ներկայացուցիչ Մարի Հարֆը լրագրողների հետ զրույցում քննադատել է արեւելյան մամուլի նկատմամբ Թուրքիայի նախագահ Ռեջեփ Թայիփ Էրդողանի հարձակումները, բայց հերքել է այն քննադատությունները, որ Թուրքիան անհուսալի դաշնակից է, չնայած երկու երկրների միջեւ աճող պառակտմանը: Այս մասին հաղորդում է «Bgnnews»-ը:
Լրագրողները Պետդեպարտամենտի ներկայացուցչին խնդրել են մեկնաբանել Էրդողանի այն հայտարարությունները, թե «The New York Times» թերթը, «CNN» եւ «BBC» հեռուստաընկերությունները փորձում են թուլացնել եւ բաժանել Թուրքիան, իսկ հետագայում մեծացրել է այդ անձանց թիվը եւ մեղադրանքներ է հնչեցրել հայերի, լրագրողների եւ համասեռամոլների նկատմամբ:
Մարի Հարֆը ասել է, որ ԱՄՆ-ն սատարում է խոսքի ազատությանը եւ մտահոգված է Թուրքիայի կառավարության կողմից խոսքի ազատության սահմանափակումներով: «Մենք երկար ժամանակ է դա ասում ենք եւ շարունակում ենք մտահոգված մնալ: ԶԼՄ-ների ազատ եւ անխափան աշխատանքը կարեւոր տարր է ցանկացած ժողովրդավարական եւ բաց հասարակության համար»:
ԱՄՆ-ն, ըստ Պետդեպի ներկայացուցչի, որպես Թուրքիայի ընկեր եւ ՆԱՏՕ-ի դաշնակից կոչ է անում այդ երկրի իշխանություններին ապահովել ժողովրդավարական արժեքները, այդ թվում՝ դատական անկախությունը եւ խոսքի ազատությունը:
Կարդացեք նաև
Լրագրողները հարցրել են, թե արդյոք Մարի Հարֆը «դատապարտում կամ պարսավում, կամ քննադատո՞ւմ» է Էրդողանին հայերին, լրագրողներին եւ համասեռամոլներին քննադատելու համար, նա պատասխանել է. «Միանշանակ»:
Պատրաստեց Աշոտ ԻՍՐԱԵԼՅԱՆԸ
