Ոսկերչությամբ զբաղվողները դժգոհ են կառավարության որոշումից, ըստ որի՝ «Արտոնագրային վճարների մասին» օրենքում փոփոխություններ կատարվեցին: Չնայած կառավարությունը եւ Հովիկ Աբրահամյանը վստահեցրել են, որ այս որոշումը նպատակ ունի օժանդակել ոսկեգործությանը, այնուամենայնիվ, ոսկու առեւտրով զբաղվողները գտնում են, որ կառավարությունը իրենց վիճակն էլ ավելի է բարդացնում:
Հիշեցնենք, որ ըստ կառավարության որոշման մինչեւ 70 սմ սեղանիկները պետք է վճարեն ամիսը 35 հազար դրամ հաստատագրված վճար, իսկ եթե այդ սահմանը անցնի, ապա յուրաքանչյուր 0,1 գծամետրի համար պիտի վճարի 5000 դրամ: Մարզերում այս թիվն ավելի պակաս է:
Այսօր «Հայացք» ակումբում Փոքր ձեռներեցությամբ զբաղվողների միության նախագահ Ստեփան Ասլանյանն ասաց, որ թեեւ կառավարությունում էկոնոմիկայի փոխնախարար Էմիլ Տարասյանը վստահեցրել է, որ ՓՄՁ-ների հետ քննարկում է եղել եւ մեծամասնությունը համաձայնվել է այս նախագծին, իրականում համաձայնություն չի եղել. «Սեփական օրենքը բերեց փաթաթեց ժողովրդի վզին ու գնաց ասեց՝ համաձայն ենք»:
Ասլանյանի խոսքերով՝ «Այս 35 հազարն էլ ոսկու առեւտրով զբաղվողների համար մեծ գումար է, քանի որ առանց այն էլ բոլորի վիճակը վատ է, առեւտուր չկա, մարդիկ հազիվ են ծայրը ծայրին հասցնում»:
Կարդացեք նաև
Aravot.am-ի այն հարցին, թե որքա՞ն է այսօր իրենց շրջանառության իրական ծավալը եւ ի՞նչ պայմաններով են իրենք ուզում աշխատել, Ասլանյանն ասաց, որ իրենք ուզում են առանց փաստաթղթավորման վճարել ամեն մեկն իր շրջանառության ծավալի 1%-ի չափով: Իսկ այն, որ նոր նախագծով հաշվարկել են 3,5 մլն դրամի 1%-ի չափով պիտի վճարվի արտոնագրային հարկը՝ սխալ է: Ասլանյանի վստահեցմամբ՝ այսօր 3,5 մլն դրամի շրջանառություն գրեթե ոչ ոք չունի:
Մանրամասն՝ տեսանյութում:
Ասուլիսի մեկ այլ մասնակից՝ «Ոսկերչությամբ զբաղվողների միավորում» հ/կ-ի նախագահ Արմեն Բաբայանն էլ ասաց, որ այս օրենքը ձեռնտու չէ ոսկու շուկաներում աշխատողների համար:
Ասուլիսին ներկա էր նաեւ անհատ ձեռներեց Միսակ Մայիլյանը, որը նշեց, թե նույն չափի սեղանիկների համար հաստատագրված վճարը ճիշտ մոտեցում չէ, քանի որ այդ նույն 70 սմ-անոց սեղանիկի վրա մի ձեռներեցը կարող է վաճառել ադամանդե քարերով թանկարժեք զարդեր, իսկ մեկ ուրիշը՝ կրկին նույն չափի սեղանիկի վրա, մի քանի անգամ էժան ապրանքներ:
Aravot.am-ը հետաքրքրվեց՝ մի՞թե ոսկյա զարդերի վաճառքով զբաղվողների ամսական շրջանառությունը 3,5 մլն-ի չի հասնում, որքա՞ն է իրական շրջանառությունը եւ ինչո՞ւ պետք է կառավարությունը վստահի ձեռներեցների առանց փաստաթուղթ ցույց տալու հայտարարած թվերին: Ասուլիսի բանախոսները շրջանառության ծավալն այդպես էլ չասացին, միայն նշեցին, որ եթե կառավարությունն իրենց չի վստահում, ապա կա հարկային մարմին, իրենք ՀԴՄ-ներ են խփում, շուկաներում ամեն տեղ կան տեսախցիկներ, թող հարկայինը ստուգի բոլորին եւ եթե որեւէ մեկը սխալ թիվ ներկայացնի՝ տուգանի:
Նելլի ԲԱԲԱՅԱՆ
