Անհնար է հասնել հայ-թուրքական սահմանի բացմանը, առանց Բաքվին ներառելու հարաբերությունների բարելավման գործընթացում: Այս մասին հունիսի 19-ին 89-րդ «Ռոուզ-Ռոթ» սեմինարի ընթացքում ասաց Եվրոպական քաղաքականության կենտրոնի ավագ վերլուծաբան Ամանդա Փոլը:
Նրա կարծիքով՝ պաշտոնական Անկարան ռազմավարական լուրջ երկընտրանքի առջեւ է կանգնել՝ ինչպե՞ս առանց Բաքվին վիրավորելու վերականգնել հարաբերությունները Երեւանի հետ: Ըստ Ամանդա Փոլի՝ եթե Ադրբեջանը չներառվի գործընթացին, այն կրկին կարող է ձախողվել: Նա նշեց, որ դեռեւս հստակ չէ, թե կոնկրետ ինչ ձեւով պետք է Բաքուն ներառվի գործընթացին:
«Հայ-թուրքական արձանագրությունները տապալվեցին Ադրբեջանի պատճառով, քանի որ Թուրքիան թերագնահատել էր Բաքվի արձագանքը, եւ հենց այդ պատճառով Թուրքիան փոխեց իր դիրքորոշումը: Երբ Բաքուն տեսավ, որ հայ-թուրքական արձանագրություններում չկար Լեռնային Ղարաբաղի մասին նախապայման, դժգոհեց, եւ Անկարան տեղի տվեց: Թուրքիան տուժեց հայ-թուրքական արձանագրությունների ձախողումից»,- ասաց Ամանդա Փոլը:
Նրա կանխատեսմամբ՝ եթե այդ գործընթացը հաջողվեր, ապա այսօր մեկ այլ Հարավային Կովկաս կլիներ, եւ Հայաստանի տնտեսությունն ավելի լավ վիճակում կգտնվեր:
Կարդացեք նաև
Ամի ՉԻՉԱԿՅԱՆ
