Եվրոպայի խորհրդի Խորհրդարանական վեհաժողովի (ԵԽԽՎ) Մոնիթորինգի հանձնաժողովի Հայաստանի հարցերով համազեկուցողներ Աքսել Ֆիշերը և Ալան Միլը դիմել են Հայաստանի ոստիկանությանը, ինչպես նաեւ ցուցարարներին, որ նրանք ցուցաբերեն առավելագույն զսպվածություն, որպեսզի ապահովվի խաղաղ ցույցերի անարգել անցկացումը եւ չկրկնվեն հունիսի 23-ին տեղի ունեցած բռնությունները:
Նրանք ընդգծել են, որ խաղաղ ցույցեր իրականացնելու իրավունքը պետք է գերակշռի: Համազեկուցողները ողջունել են միջադեպի ընթացքում ձերբակալված անձանց ազատ արձակումը եւ «Ոչ թալանին» նախաձեռնության ու ոստիկանության միջեւ կայացած համաձայնությունն, որը թուլացրել է Երեւանում առկա լարվածությունը:
Միեւնույն ժամանակ, համազեկուցողները անհանգստություն են հայտնել այն պնդումների առնչությամբ, թե ոստիկանության կողմից չափից շատ ուժ է կիրառվել եւ ցուցարարների ցրելու ընթացքում լրագրողները հայտնվել են նպատակային թիրախի տակ: Նրանք ասել են, որ այս մեղադրանքները պետք է անկողմնակալ եւ թափանցիկ քննության առարկա դառնան:
Պատրաստեց Աշոտ ԻՍՐԱԵԼՅԱՆԸ
