Ի տարբերություն երկու գիշեր առաջվա՝ այսօր Բաղրամյան պողոտայում ոչ միայն մարդկանց քանակն է անհամեմատ մեծ, այլեւ՝ համախմբվածությունն ու անելիքի հստակությունն է պարզ եւ ակնհայտ:
Այս 48 ժամվա ընթացքում հսկայական փոփոխություն է նկատվում: Կազմակերպիչները եւ նախաձեռնությունն առաջնորդողները թեեւ շատ են եւ, ըստ էության, դրանով իսկ՝ «անորսալի», սակայն անմիջապես նկատվում է, որ կա ինչ-որ պատասխանատվության եւ պատրաստվածության ոգի, այլեւս անցյալ են դարձել «դու ո՞վ ես», «բա դո՞ւ ով ես» տիպի խոսակցությունները, իրար չհասկանալը, «հրաժարական տալը»:
Կարդացեք նաև
Մթնոլորտը հիանալի է եւ ոգեւորող, իսկ մարդկանց բազմաթիվ լինելը՝ ավելի քան ուրախացնող: Հիմնական զանգվածը հրաշալի հույզեր արթնացնող եւ սեփական ազգով հպարտանալու տեղիք տվող երիտասարդությունն է:
Քիչ առաջ մի քանի րոպեով անջատվեցին Բաղրամյան պողոտայի փողոցային լույսերը, եւ ցուցարարների միահամուռ սուլոցների եւ գոռում-գոչունների ներքո եւ ամենայն հավանականությամբ՝ հենց դրա ազդեցության տակ, լույսերը կրկին վառվեցին: Դրանից հետո մի քանի րոպե հնչում էին «հաղթանակ», «մենք ենք տերը մեր երկրի», «կասեցում» վանկարկումները:
Մելանյա ԲԱՐՍԵՂՅԱՆ
