Զեևքի արսենալը, որը ջանասիրաբար նկարագրել էին ԱԱԾ հաղորդագրությունը գրողները, Արա Բուդաղյանի հետ կապ չունի։ Նրա մոտ, ըստ նրա փաստաբան Հայկ Ալումյանի, միայն մեկ ատրճանակ են հայտնաբերել։ «Իր մոտ եղել է մեկ օրինական ատրճանակ, որն արձանագրվել է»,- ասում է փաստաբանը, որը եւս բողոքարկել է կալանավորման որոշումը։ Նա ներկայումս ուսումնասիրում է Արա Բուդաղյանին ներկայացված մեղադրանքի ապացույցները, որոնց հիման վրա նրան մեղադրում են շատերի կյանքի համար վտանգավոր եղանակով սպանության փորձի դրդելու մեջ։
Ըստ փաստաբանի, դրանք «թշվառ» են։ Հարցին, թե ինչ առնչություն է ունեցել Արա Բուդաղյանը մյուսների հետ եւ արդյոք ճանաչել է նրանց, փաստաբանը պատասխանեց. «Երկուսին չի ճանաչում։ Մեկին է ճանաչում։ Ուղղակի մի տարիքի են եղել։ Դպրոցում իրար հետ են սովորել։ Ժամանակին ֆուտբոլ են խաղացել իրար հետ։ Մեկ էլ մոր մահվան առիթով այս մեկը 200 հազար դրամ է ուզել Արա Բուդաղյանից։ Մի մասը վերադարձրել է, մյուս մասի համար էլ ներողություն է խնդրել, որ չի կարողացել ժամանակին վերադարձնել, եւ հեռախոսով ժամանակ է խնդրել Արա Բուդաղյանից։ Այս կարգի մի հեռախոսային խոսակցություն են ֆիքսել, եւ իրենց թվում է, թե այսքանը բավարար է»։ Խոսքը, ըստ երեւույթին, Վիտալի Մինասյանի մասին է։
Ըստ Ալումյանի, այս գործը լավ առիթ է իրավապահների համար՝ շեղելու հանրության ուշադրությունը ոչ միայն Զաքարյաններից, այլեւ Ավետիք Բուդաղյանի սպանության գործից, որով ներկայում ակտիվ գործողություններ են կատարվում։
Սյուզան ՍԻՄՈՆՅԱՆ
Կարդացեք նաև
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
Լուսանկարում՝ Հայկ Ալումյանն Արտակ Բուդաղյանի հետ