Բնության կողմից ստեղծված սպիտակուցների ցածր պարունակությամբ օժտված սնունդը նպաստում է օրգանիզմի լավատեսորեն տրամադրվելուն, նրա խաղաղ եւ հանգիստ վիճակին: Այն հնարավորություն է ընձեռում օրգանիզմին կուտակելու սննդարար նյութերի պաշարներ, որոնք կօգտագործվեն հարկ եղած դեպքում: Այսպիսի միտք արտահայտել է ամերիկացի բժիշկ Դ. Ս. Ջարվիսը՝ ավելացնելով, որ երբ մարդը գործում է բնության օրենքներին հակառակ՝ ենթարկվելով միայն սեփական քմահաճույքներին եւ ցանկություններին՝ նպաստում է իր օրգանիզմի հոռետեսական տրամադրվածությանը: Ըստ նրա` եթե մարդու ծնողները ապրեն էմոցիաներ ծնող պայմաններում եւ օգտագործեն սպիտակուցներով հարուստ եւ ածխաջրերով աղքատ սնունդ, ապա նրանք կունենան հյուծված երեխա: Այլ կերպ ասած` ծնողները, գործելով բնության օրենքներին հակառակ, փչացնում են հրաշալի ժառանգական հիմքը: Ժառանգականության այսպիսի ընդհատումը կարող է որոշակիորեն ազդել նորածնի ուղեղի, մկանային, մարսողական եւ նյարդային համակարգերի, ինչպես նաեւ մարմնի մեծության վրա: Եթե այսպիսի նորածինը, այնուամենայնիվ, շնորհիվ զարգացման բարենպաստ պայմանների կարողանա պահպանել իր գոյությունը, ապա սովորաբար նա շատերին կզիջի իր տոկունությամբ եւ հաջողությունների չի հասնի:
Բժիշկը օրինակ է բերում կենդանական աշխարհից. երբ խախտվում է որսորդական շների հրաշալի ժառանգական հիմքը, այդ շներից ծնվում են վախկոտ ձագեր: Նրանց փետրավոր թռչնաորսի տանելիս պետք է հաճախ ձայն տալ եւ ոգեւորել: Հակառակ ժառանգականությունը խախտած ձագերի՝ առողջ ձագերը ավելի համարձակ են լինում, իսկ մարզումների ժամանակ կարիք է լինում զսպել նրանց եռանդը, քանի որ այն բավական ակտիվ բնույթ է ստանում:
Էջը պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
23.07.2015
