Ըստ ՍԴ անդամի՝ այն տեսակետը, որ այս նախագծով մեր ապագա նախագահը դառնում է Անգլիայի թագուհի՝ բացարձակ հիմնավորված չէ
«Նախագահն այսօր կորցնում է անմիջական մանդատը: Երկրում կլինի միայն մեկ Սահմանադրական պետական մարմին՝ ԱԺ-ն: Դա բերում է նրան, որ մի շարք հարցերում չի ունենալու ինքնուրույնություն, մի շարք հարցերի ընդունման ժամանակ նրա ստորագրությունը անպայման կրկնաստորագրություն է պահանջելու, նրա ստորագրության տակ ստորագրելու է կա՛մ վարչապետը, կամ կոնկրետ ոլորտի նախարարը, որը պատասխանատվություն է կրելու պառլամենտի առջեւ: Նախագահի հիմնական գործառույթը Սահմանադրության պահպանումն է եւ ազգի միասնության պահպանումը: Նա պետք է լինի անաչառ եւ ապակուսակցական անձնավորություն»,- այսօր «Հայացք» ակումբում Սահմանադրական փոփոխությունների նախագծի դրույթներն այսպես մեկնաբանեց Սահմանադրական դատարանի անդամ Ֆելիքս Թոխյանը:
Ըստ նրա՝ առաջին փուլով շատ դժվար է ՀՀ-ում որեւէ մեկը նախագահ ընտրվի, երկրորդ փուլով հնարավոր է, բայց հաշվի առնելով մի շարք երկրների տխուր փորձը, մեր նախագծով նախատեսվել է երրորդ փուլը, երբ ՀՀ նախագահը կընտրվի ընտրիչների ձայների մեծամասնությամբ: Դա արդեն երաշխավորում է, որ որեւէ մեկը հաստատ մի ձայն ավելի կստանա:
Aravot.am-ի հարցին՝ նախագծում նշված է, որ ՀՀ նախագահին կարող են պատասխանատվության ենթարկել կամ պաշտոնանկ անել, եթե նա կատարել է ծանր հանցագործություն, այսինքն, սա ենթադրում է, որ նախագահը կարող է գողություն անել եւ պատասխանատվության չենթարկվե՞լ, Ֆելիքս Թոխյանը պատասխանեց. «Դուք մեկնաբանում եք, թե ինչ է ծանր հանցագործությունը: Քրեական օրենսգրքում գրված է, թե ինչ է ծանր հանցագործությունը: Եթե ՔրՕրում նշվում է, որ հավ գողանալը ծանր հանցագործություն է, ապա՝ հա, բայց չի նշվում մեր օրենսգրքում»:
Կարդացեք նաև
Մենք ճշտեցինք՝ այսինքն, ստացվում է, որ այդպե՞ս է, կարող է գողություն անել եւ պատասխանատվության չենթարկվե՞լ, նա պատասխանեց. «Եթե դուք կարծում եք, որ նախագահին հավ գողանալու համար պետք է իմպիչմենտի ենթարկեն, դա….»:
Նախագծում լավը, դրականը, ըստ Թոխյանի, այն է, որ նախագահի իմպիչմենտի հիմքերից մեկը ավելացել է՝ Սահմանադրության կոպիտ խախտում, ինչը չի եղել:
Մեր հարցին՝ եթե նախագահի լիազորություններն այդպես կրճատվել են, կրկնաստորագրություն է պահանջվում նրա հրամանների համար, ինչի՞ համար է այդ պաշտոնը, մեզ պե՞տք է այդպիսի նախագահ, Ֆելիքս Թոխյանը պատասխանեց. «Դա պետության գլուխն է: Նախագահն ունի բավականին լուրջ եւ ինքնուրույն լիազորություններ, եւ այն տեսակետը, որ այս նախագծով մեր ապագա նախագահը դառնում է Անգլիայի թագուհի՝ բացարձակ հիմնավորված չէ»:
Հռիփսիմե ՋԵԲԵՋՅԱՆ
