«Հայ-իրանական հարաբերություններում անընդհատ հետահայաց նայել Ադրբեջանին, ճիշտ չէ: Մենք մեր հարաբերությունները պետք է զարգացնենք անկախ Իրան-Ադրբեջան հարաբերություններից»,- այսօր «Անալիտիկ» մամուլի ակումբում կարծիք հայտնեց իրանագետ Վարդան Ոսկանյանը:
Իրանագետի գնահատմամբ, Իրան-Ադրբեջան հարաբերություններում տնտեսական առաջնություններ կան, բայց, միաժամանակ, կողմերի միջեւ առկա է վստահության պակաս, խնդիրների մի ողջ բույլ, մասնավորաբար Իրան-ադրբեջանական սահմանային խնդիրներ, մշակութային, Կասպից ծովի սահմանազատման հարցեր, Իրանի հյուսիսային շրջաններում ադրբեջանական պանթուրքիստական հավակնություններ եւ այլն: Այս առումով, իրանագետը կարեւոր է համարում այն, որ Իրանն ընդհանրապես իր հարաբերությունները կապում է ոչ միայն տնտեսական հարցերով: Օրինակը`Սիրիայի հետ հարաբերություններն են, որոնք բացառապես քաղաքական եւ տարածաշրջանային անվտանգության խնդիրներ են լուծում: Լինելով անգամ պատժամիջոցների տակ, Իրանը շարունակում է բավական մեծ գումարներ տրամադրել Ասադի կառավարությանը, որի վերադարձը բավական մշուշոտ է:
«Իրանցիները քաջ գիտակցում են, որ տարածաշրջանում պրոիրանական կողմնորոշում ունեցող միակ երկիրը ՀՀ-ն է ու պատերազմի տարիներին դա բազմիցս ապացուցվել է»- ասում է Վարդան Ոսկանյանը`հավելելով, որ սա չի նշանակում, որ պետք է կուրանանք. «Պիտի շարունակենք ակտիվ աշխատել, ներսում լոբբիստական գործունեություն ծավալել`անկախ Իրան-Ադրբեջան հարաբերություններից»:
Նելլի ԳՐԻԳՈՐՅԱՆ
