Այսօր Անկախության տոնն է,եւ Եռաբլուր էին այցելել ՀՀ բարձրաստիճան պաշտոնյաները՝ նախագահ Սերժ Սարգսյանի գլխավորությամբ:
Սերժ Սարգսյանը ծաղիկներ դրեց եւ խոնարհվեց Վազգեն Սարգսյանի, Զորավար Անդրանիկի շիրիմներին:
Եռաբլուրից չէր հեռացել, երբ նրա անվտանգության աշխատողների պատը ճեղքելով՝ արագ նրան մոտեցավ մի սեւազգեստ կին եւ սկսեց լացելով պատմել, որ կարկուտ է եղել, ամբողջ խաղողի բերքը վնասվել է եւ մթերող գործարանները չեն ընդունում ու փոխհատուցում էլ չեն տալիս: Սերժ Սարգսյանը կնոջը լսելուց հետո արձագանքեց. «Բա որ ավերվել է, ի՞նչ է նշանակում, ավերված խաղողը ո՞նց տանեն»:
Կինն էլ, թե՝ «Ավերվել ա, ոնց որ ես մեղավոր եմ»: Սերժ Սարգսյանն էլ պատասխանեց. «Իսկ ո՞վ է մեղավոր, նա մեղավո՞ր ա, որ չի ընդունում: Եկել են, նայել են, նկարել են, վնասները կփոխհատուցեն: Ով որ վարկ ա վերցրել, կարծում եմ, վճարումները կհետաձգեն: Բա ինձ որ ասում ես, ավիրված խաղողդ բա ի՞նչ անեն, իրանք ո՞նց ընդունեն, եթե խաղողը, ձեր ասած, փչացած ա»:
Կարդացեք նաև
Նա հորդորեց իր աշխատակիցներին, որ կնոջ խնդրով զբաղվեն:
Հետո մի սեւազգեստ մայր որդու լուսանկարները ձեռքին փորձեց մոտենալ ու բղավել. «Սե՜րժ, մի րոպե, Սե՜րժ»:
Բայց այս կնոջը թույլ չտվեցին մոտենալ նախագահին:
Հռիփսիմե ՋԵԲԵՋՅԱՆ
