«Հայելի» ակումբում այսօր Հայկական վերածնունդ եւ «Հայազն» կուսակցությունների անդամները ներկայացրեցին իրենց դիրքորոշումը Սահմանադրական փոփոխությունների մասին:
Երկու կուսակցություններն էլ հայտարարեցին, որ իրենք ոչ-ի կողմնակից են: «Հայկական վերածննդի» անդամ Կարեն Թումանյանի կարծիքով, ինստիտուտի թուլացումն այս երկրի համար չէ: ԵՏՄ-ում ասենք Նազարբաեւը, Լուկաշենկոն, Պուտինը հավաքվում են, մեր նախագահին հարց տան, հո չի՞ ասելու՝ մի հատ զանգեմ տեսնեմ վարչապետն ինչ է ասում, զավեշտի է վերածվելու:
Նույն կուսակցության ներկայացուցիչ Վահե Մոսինյանն էլ կոչ արեց ոչ-ի մյուս ճակատներին միավորվել իրենց. «Մենք ինքնին ձեւավորել ենք ոչ-ի լայն ճակատ, որը ներգրավել է 140 կազմակերպություն, որից 12-ը՝ կուսակցություն»:
Հարցին՝ հնարավո՞ր է դուք միանաք մյուսներին՝ Կարեն Թումանյանը բարկացավ՝ ինչո՞ւ եք այդպես հարցը դնում, ով առաջինը զարթնեց, նա՞ է թելադրում: 140 կազմակերպությունը քի՞չ է:
Կարդացեք նաև
Լրագրողները խնդրեցին այդ 140 կազմակերպություններից նշել հանրությանը հայտնի գոնե 4 կուսակցություն եւ ՀԿ:
Վահե Մոսինյանը պատասխանեց. «Կարող եմ 4-ից ավելին նշել, օրինակ, Լիբերալ ժողովրդավարական կուսակցություն Դավիթ Հարությունյանի, Ռուբեն Ավագյան, Միավորված հայեր կուսակցություն, մեզ միացել են ազատամարտիկներ Վաչագան Չիբուխչյանը իր կուսակցությամբ, Սարգիս Կարապետյանը, Ազգային արժեքների պահպանման ճակատ ՀԿ-ն»:
«Հայազն» Արմեն Աղայանի խոսքերով՝ իրենք ոչ-ի կողմնակից են, եւ ոչ մի կոմպլեքս չունեն, որ 140 կազմակերպություն չեն միավորում, գործում են մենակ. «Տարբեր քաղաքական ուժեր տարբեր հինավորումներով են ոչ ասում: Օրինակ, ՀԱԿ-ը ուզում է փրկել Լեւոն Տեր-Պետրոսյանի ստեղծած նախագահական համակարգը: Հանրային փրկության ճակատն ուզում է սա օգտագործել իշխանափոխության համար: Այստեղ ասացին ԵՏՄ-ում մեր նախագահի դերի մասին, բայց եթե Սահմանադրության մեջ միակ դրական բան կա, գուցե նա է, որ ԵՏՄ-ում մեր երկրի ղեկավարը ընդհանրապես անելիք չունենա: Մեր համոզմունք է, որ մեր երկրի ղեկավարը որեւէ անելիք չունի որեւէ միավորման մեջ ինտեգրացիոն գործընթացում»:
Արմեն Աղայանը հայտարարեց, որ ամռանը ինքը Հեղինե Բիշարյանից զանգ է ստացել հրավերի եւ առանց հասկանալու, թե ինչ է ուզում՝ մերժել է, քանի որ ՕԵԿ-ից որեւէ առաջարկ չի ընդունում. «ՕԵԿ-ը արդեն ժամանակավրեպ է, կուսակցություն էլ չի»:
Կարեն Թումանյանը պատասխանեց. «Մի կուսակցության, որը 18 տարի պառլամենտական կուսակցություն է եղել, որի պատգամավորները բոլոր չափանիշներով ամենաակտիվն են ԱԺ-ում եւ անվանել դա, որ կուսակցություն չի՝ նոնսենս է: Կարող եմ ասել, որ «Հայազնը» նոր է, մի քիչ քաղաքական փորձ չունի»:
Նա հորդորեց մտնել ԱԺ կայք եւ նայել ՕԵԿ-ի պատգամավորների նախագծերը: Օրինակ, սուպերմարկետների մասին օրենքը վա՞տ օրենք էր, որն առաջարկում էին ՕԵԿ պատգամավորները:
Դիտարկմանը, որ Հեղինե Բիշարյանը մի կողմից սուպերմարկետների, մենաշնորհացման դեմ է պայքարում, մյուս կողմից այդ մենաշնորհատիրոջ համար՝ Սամվել Ալեքսանյանին հայտարարում է, որ իմ ախպերն է՝ Կարեն Թումանյանը նեղացավ. «Լավ, էլի»:
Հռիփսիմե ՋԵԲԵՋՅԱՆ
