«Ես դեմ եմ, որ խոշորներին տան»,- այսօր, խորհրդարանում շարունակվող 2016 թվականի բյուջետային քննարկումների ժամանակ հայտարարեց ՀՀ գյուղատնտեսության նախարար Սերգո Կարապետյանը`պատասխանելով ԲՀԿ խմբակցության պատգամավոր Արմեն Ավետիսյանի հարցին:
Պատգամավորը Սերգո Կարապետյանից հետաքրքրվել էր, թե ինչու են միայն փոքր գյուղացիական տնտեսություններին հատկացվում սուբսիդավորվող դիզվառելիքը եւ պարարտանյութերը: Նա կարծում է, որ սուբսիդավորվող դիզվառելիքից եւ պարարտանյութից պետք է օգտվեն նաեւ միջին եւ խոշոր հողօգտագործողները, մանավանդ, որ գալիք տարվա բյուջեով նախատեսված է, որ 51 տոկոսով ավելացվելու են այդ նպատակով հատկացվող գումարները:
Գյուղատնտեսության նախարարը բացատրեց, որ այդ ծրագիրը սոցիալական բնույթ ունի ու առաջին հերթին նպատակ կա օգնել սոցիալապես անապահով գյուղացիներին:
Նելլի ԳՐԻԳՈՐՅԱՆ
