Ավան եւ Նոր Նորք վարչական շրջանների ընդհանուր իրավասության դատարանում (նախագահող դատավոր՝ Դավիթ Հարությունյան) Ռազմական ինստիտուտում այս տարվա հունվարին դաժանաբար սպանված կուրսանտ Հայկազ Բարսեղյանի գործով նիստին այսօր չէին ներկայացել պաշտպան Հովիկ Արսենյանը, ամբաստանյալ Վարազդատ Սաֆարյանը և պաշտպան Ազատ Շահբազյանը: Նրա փոխարեն նիստին ներկայացել էր պաշտպան Հովհաննես Սարգսյանը:
Նախագահող դատավորը հայտարարեց, թե նպատակահարմար չէ նիստը շարունակել պաշտպանի և ամբաստանյալի բացակայությամբ: Նշենք, որ պաշտպան Հովիկ Արսենյանն ու ամբաստանյալ Վարազդատ Սաֆարյանն արդեն երկրորդ նիստին է չեն ներկայանում, սակայն դատարանը հայտարարեց, որ Վարազդատ Սաֆարյանի հրամանատարությունը պատշաճ ծանուցված է եղել:
Դատարանը հայտարարեց, որ հաջորդ դատական նիստին քննարկվելու է պաշտպանի և ամբաստանյալի նկատմամբ սանկցիա կիրառելու հարցը: Դատարանը նաև տեղեկացրեց, թե դատարանին է ներկայացվել Հայկազ Բարսեղյանի հոր՝ Արկադի Բարսեղյանի դիմում-բողոքն այն մասին, որ իրենց նկատմամբ սպառնալիքներ են կիրառվում ամբաստանյալների կողմից:
Կարդացեք նաև
Տուժողի իրավահաջորդի ներկայացուցիչ Գագիկ Գալիկյանը նշեց, որ ինքը տեղյակ չէ այդ դիմում-բողոքից, տեղեկանալու և մանրամասներին ծանոթանալու դեպքում կհայտնի դատարանին:
Կողմերը չմերժեցին նիստը հետաձգելու՝ դատավորի առաջարկը: Հաջորդ դատական նիստը տեղի կունենա դեկտեմբերի 10-ին, ժամը 13.00-ին:
Տաթև ՀԱՐՈՒԹՅՈՒՆՅԱՆ
