ԼՂՀ վարչապետ Արայիկ Հարությունյանը երեկ խոսել է հակամարտության գոտում ռուս խաղաղապահներ տեղակայելու, ռուս- թուրքական սրացման, լայնամասշտաբ ռազմական գործողությունների վերսկսման հավանականության, Սարգսյան- Ալիեւ սպասվող հանդիպման, ինչպես նաեւ Արցախում սահմանադրական փոփոխությունների անցկացման հավանականության մասին:
– Դուք ինչո՞վ եք պայմանավորում սահմանային նոր լարվածությունը՝ Սարգսյան-Ալիեւ սպասվող հանդիպմա՞մբ, թե՞ ռուս-թուրքական հարաբերությունների սրմամբ։
– Մենք հոգնել ենք սահմանի լարվածությունը որեւէ միջադեպի կամ միջոցառման հետ կապելուց։ Ընդհանուր առմամբ, ոչ պատերազմ, ոչ խաղաղություն իրավիճակ է եւ ամեն օր կարող է ինչ-որ խնդիրներ լինեն, չեմ ուզում դա կապել Սարգսյան-Ալիեւ հանդիպման կամ Դավութօղլուի՝ Ադրբեջան կատարած այցելության հետ։
– Պարզապես զինադադարի կնքումից հետո երեկ առաջին անգամ ադրբեջանական զինուժը տանկերից է կրակել։
Կարդացեք նաև
– Մեկ տարի առաջ կամ ամիսներ առաջ հրանոթից են կրակել, դրանից առաջ ականանետերից են կրակել, դրանից առաջ դիպուկահարներ…, այսինքն, լարվածություն՝ նշանակում է, որ միշտ էլ ինչ-որ աննախադեպ միջոցառում կլինի։ Դրա համար պետք է միշտ լինել պատրաստ։
– Բայց ՀՀ պաշտպանության նախարար Սեյրան Օհանյանը երեկ ասաց, որ լարվածությունը գագաթնակետին է հասել, իսկ ՀՀ ՊՆ խոսնակ Արծրուն Հովհաննիսյանը հայտարարեց, որ մեզ մեկ քայլ է բաժանում լայնամասշտաբ պատերազմից։
– Ես չեմ ասի, ես չեմ ուզում այդպիսի գնահատականներ տալ, որովհետեւ մենք արդեն սովոր ենք նման իրավիճակների։
– Դուք մտավախություն չունե՞ք, որ ռուս-թուրքական այս ծայրահեղ լարվածությունը կարող է իսկապես բերել պատերազմի։
– Ես ոչ մի մտավախություն չունեմ, մենք 1994 թվականի զինադադարից սկսած ամեն օր էլ պատրաստ ենք եւ ամեն օր էլ սպասում ենք, որ կարող է սրացումներ, ընդհուպ մինչեւ մարտական գործողություններ լինեն։ Եթե մի բանի պատրաստ ես, որեւէ զարմանալի բան չես տեսնի:
Լուսինե ԲԱՐՍԵՂՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
