Գերմանիայի Լայպցիգ քաղաք մեկնած հայ լրագրողների խումբն այցելել էր շատ հայտնի MDR հեռուստաընկերություն: Լրատվական բաժնի ղեկավարների հետ հանդիպման ժամանակ փորձեցինք պարզել, թե իրենց հեռուստաընկերությունը որքան հաճախ է անդրադառնում Հայաստանին եւ ինչ նյութեր է հեռարձակել մեր մասին: Ցանկը մեծ էկրանի վրա ցուցադրեցին, ու պարզվեց՝ մեր երկրին վերաբերող ընդամենը 3 նյութ կա: Մեկը Հայոց ցեղասպանության մասին էր, որը հեռարձակվել էր ապրիլի 24-ին, մյուսը՝ Քիմ Քարդաշյանի, որն ամուսնու եւ քրոջ հետ եկել էր Հայաստան, իսկ երրորդը՝ մաֆիայի մասին: Ըստ տեղեկատվության՝ Գերմանիայում ակտիվացել են թմրամիջոցների վաճառքի, ավտոմեքենաների հափշտակման, դրամաշորթման, զենքի առեւտրի եւ փողերի լվացման դեպքերը, որոնք իրենց ձեռքն են վերցրել իտալական եւ ռուսական մաֆիայի հանցախմբերը: Իսկ որ ամենակարեւորն է՝ նրանց լիդերներն են հենց մեր հայերը: Այսքանով ավարտվում է գերմանական առաջատար լրատվամիջոցում Հայաստանի մասին տեղեկատվությունն ու պատկերացումը:
Լուսանկարները՝ Հռիփսիմե Ջեբեջյանի
«Առավոտ» օրաթերթ
