Ինչպես հայտնի է, «Նոր Հայաստան» միավորումը հայտարարել է, թե Ազատության հրապարակում իրենց հարթակը տրամադրում է երիտասարդներին: Aravot.am-ը երիտասարդ ակտիվիստներից հետաքրքրվեց, թե ինչպե՞ս են վերաբերվում այդ առաջարկին եւ արդյոք պատրա՞ստ են դա ընդունել:
Մաքսիմ Սարգսյան
«Ոչ թալանին» նախաձեռնության անդամ Մաքսիմ Սարգսյանն ասաց, որ այս պահին չի տեսնում այդ հարթակում կանգնելու, խոսելու իմաստն ու նպատակը: Նա ընդգծեց, որ անձամբ ինքը առաջարկություն չի ստացել. «Գլոբալ առաջարկ է, այստեղ մերժելու խնդիր չկա: Կարծում եմ՝ ով համաձայն է կգնա, մնացածն իրենց չեզոք կպահեն: Մերժել կարելի է անհատական առաջարկը, բայց այստեղ ընդհանուր առաջարկ է, որին կհամաձայնեն մարդիկ, որոնք ցանկություն կունենան, եւ պարզապես չեզոք կմնան ինչպես ես այն մարդիկ, որոնք չունեն ցանկություն»:
Վաղինակ Շուշանյան
Քաղաքացիական ակտիվիստ Վաղինակ Շուշանյանը ասաց, որ այդ հարցի շուրջ խոսել է «Նոր Հայաստանի» հետ, եւ կարծում է, որ իր կարծիքը բարձրաձայնելու անհրաժեշտություն դեռ չկա. «Երբ որ ժամանակը գա, բոլորն էլ կիմանան»:
Արթուր Քոչարյան
«Ոչ թալանին» նախաձեռնության անդամ Արթուր Քոչարյանը նկատեց, որ վերջին շրջանում երիտասարդներ բառն առանձնացվել է. «Իրոք չէի ուզենա, որ առանձնացվեր: Երևի, Բաղրամյանից եկավ այդ բառը կոնկրետ երիտասարդներ, որովհետեւ այդտեղ էին ավելի շատ երիտասարդները: Ես ավելի կողմնակից կլինեի, որ չասեին միայն երիտասարդներ, չառանձնացվեր, ընդհանուր ժողովուրդ ասվեր՝ ժողովուրդը գա մասնակցի, որովհետեւ ի՞նչ կապ ունի՝ երիտասա՞րդ է, թե՞ մեծ մարդ է, ինքը կարողանում է լուրջ բան ասի, խելոք միտք ասի:
Կարդացեք նաև
Ինչ վերաբերվում է երիտասարդությանը հանելուն, ինձ թվում է՝ հարմար ժամանակ չէ, որովհետեւ նախ, եթե քաղաքական տեսանկյունից նայենք գործընթացները պետք է հարմար վիճակում լինեն: Շուտով Նոր տարի է, ֆորսմաժորային իրավիճակ էլ չէ, որ մարդիկ Նոր տարին թողնեն, դուրս գան փողոց: Ինձ թվում է՝ լավ կլինի, որ Նոր տարուց հետո խոսակցություններ լինեն, հանգիստ շրջան է, չեմ կարծում, որ դուրս կգան մարդիկ: Լավ բան է ընդհանրապես նոր բան մտածել-անելը, իմ կարծիքով՝ պետք է դրա համար ավելի հարմար ժամանակն ընտրել»:
Նա նշեց, որ իրեն անձամբ նման առաջարկ չի եղել, նախաձեռնությունում էլ չեն քննարկել. «Երբ որ մեզ հստակ առաջարկ լինի կքննարկենք ու կասենք, այսպես պատասխան չունենք, մենք թիմ ենք ու անհատապես չենք գործում»:
Ամի ՉԻՉԱԿՅԱՆ
