Այսօր «Հենարան» ակումբում լրագրողները ԱԺ էթիկայի ժամանակավոր հանձնաժողովի նախագահ Վահան Բաբայանից հետաքրքրվեցին՝ ի՞նչ կարծիք ունեք ՀՀԿ պատգամավոր Շուշան Պետրոսյանի հայտնի դեպքի մասին, երբ «լակոտ, աչքերդ կհանեմ» արտահայտությամբ սպառնացել էր քաղաքացուն ՝ ֆեյսբուքյան մեկնաբանության համար:
Վահան Բաբայան
Վահան Բաբայանը պատասխանեց. «Շուշան Պետրոսյանի դեպքի հետ կապված կարծիք ունեմ, որը հաճույքով կկիսվեմ լրագրողների հետ, բայց էթիկայից դուրս կլինի իմ անձնական կարծիքն ասելը: Մենք նաեւ երեկվա տվյալներով՝ նամակը դեռ չենք ստացել պաշտոնապես: Չեմ ուզենա գնահատականներ տալ, որովհետեւ դա կլինի կանխակալ դիրքորոշում հայտնել, բայց ես ընդհանրապես չեմ ողջունում լրագրողների կամ քաղաքացիների նկատմամբ նման արտահայտություններ անելը: Նման արտահայտությունները պետք է տեղ չգտնեն քաղաքական գործչի, պատգամավորի բառապաշարում»:
Նա ասաց, որ ինքն էլ է սոցցանցերում բավականին շատ քննադատություններ լսում իր հասցեին, բայց երբեւիցե իրեն թույլ չի տա նման ոճով պատասխանել, հանդարտ է ընդունում:
Վահան Բաբայանն ասաց, որ կուզենար էթիկայի հանձնաժողովը ունենար պատժելու գործառույթ. «Պատգամավորները չպետք է ասեն՝ հա ինչ անենք, էթիկայի հանձնաժողովն ինչ պետք է անի, որ: Բայց հիմա եթե որեւէ պատգամավոր օրենք է խախտելու, արձանագրվելու է միանշանակ»:
Կարդացեք նաև
Հռիփսիմե ՋԵԲԵՋՅԱՆ
