Դիլիջան քաղաքը եւ շրջակա 6 գյուղերն այժմ կազմում են մեկ համայնք: Փետրվարի 14-ին կկայանան Դիլիջան համայնքի ղեկավարի եւ ավագանու ընտրություններ: Իջեւան քաղաքում տեղակայված Տավուշի մարզի թիվ 41 ընտրատարածքային ընտրական հանձնաժողովի նախագահ Աիդա Սարգսյանից տեղեկացանք, որ ներկայումս առաջադրվել է համայնքի ղեկավարի 2 թեկնածու՝ ՀՀԿ Դիլիջանի շրջանային կազմակերպության ղեկավար, ՀՀԿ Տավուշի տարածքային խորհրդի կողմից համայնքի ղեկավարի թեկնածու առաջադրված, 2005 թվականից Դիլիջանի քաղաքապետ,1968թ. ծնված Արմեն Սանթրոսյանը եւ անկուսակցական, Դիլիջան համայնքի ղեկավարի թեկնածու ինքնաառաջադրված. 1946թ. ծնված Ժորա Սահաբալյանը: Թիվ 41 ԸՀՀ ներկայացրած փաստաթղթերում նշված է, որ Ժ. Սահաբալյանը ոչ մի տեղ չի աշխատում:
Հավելենք, որ 2002-2005թթ. Դիլիջանի քաղաքապետ աշխատած Ժ. Սահաբալյանը 2008թ. Դիլիջանի քաղաքապետի ընտրություններում թեկնածու է առաջադրվել, հետո հանել թեկնածությունը: Նա 2012թ. ԲՀԿ-ի կողմից քաղաքապետի թեկնածու է առաջադրվել, սակայն չի ընտրվել:
Տավուշի մարզի թիվ 41 ԸԸՀ նախագահից տեղեկացանք, որ Դիլիջան համայնքի ավագանու 15 տեղի համար ներկայումս առաջադրվել է 33 թեկնածու, որից 18-ն անկուսակցական է, 12-ը՝ ՀՀԿ անդամ, մեկական հոգի՝ ԲՀԿ, ՕԵԿ, ՀՅԴ անդամ:
Համայնքի ղեկավարի եւ ավագանու թեկնածուների առաջադրումը կշարունակվի մինչեւ հունվարի 24-ի ժամը 18-ը:
Կարդացեք նաև
Ոսկան ՍԱՐԳՍՅԱՆ
