Al-Jazeera հեռուստաալիքը 30 րոպեանոց ռեպորտաժ է պատրաստել՝ անդրադառնալով Գյումրիում երկրաշարժից հետո առաջացած անօթևանության խնդրին և օրեր առաջ այդ խնդիրը լուծելու համար սկսված դրամահավաքին:
Հունվարի 20-ից լուսանկարիչ Հայկ Բարսեղյանը բրիտանական Crowdfunder ռեսուրսում նախաձեռնել է բարեգործական դրամահավաք՝ 13 անօթևանների ընտանիքների համար բնակարան գնելու նպատակով:
Հաղորդման ընթացքում ուղիղ կապ է հաստատվել նախաձեռնության հեղինակ Հայկ Բարսեղյանի, ինչպես նաև լրագրող Մարի Թիթիզյանի, «Հայրենիքի զարգացման նախաձեռնություն» հիմնադրամի ղեկավար Թիմոթի Սթրեյթի և «Հայաստան» համահայկական հիմնադրամի ծրագրերի ղեկավար Վարդան Փարթամյանի հետ:
«Ուզում եմ ամբողջ աշխարհին ասել, որ ես պատրասվում եմ գումար գտնել այդ մարդկանց համար բնակարան գնելու նպատակով: Ես շատ բան եմ տեսել նրանց տներում. նրանք ուտելիք չունեն, նրանք ձմեռային հագուստ չունեն: Շատ դժվար է տեսնել այն, ինչ ես եմ տեսել: Հայաստանի կառավարությունը ոչինչ չի անում այս մարդկանց համար»,- իր խոսքում ասել է Հայկ Բարսեղյանը:
Կարդացեք նաև
Հաղորդման ընթացքում քննարկվել է նաև այն հարցը, թե արդյոք երկրաշարժի հետևանքները չեզոքացնելու բեռը պետք է դրվի իշխանությունների վրա, թե մասնավոր սեկտորի:
«Ես այս նախագծի վրա աշխատել եմ շուրջ 4 տարի: Դա շատ բարդ աշխատանք է: Երբ նայում ես այդ երեխաների աչքերին, շատ դժվար է լուսանկարել նրանց: Ես ցանկանում եմ գումար գտնել նրանց համար: Կառավարությունը չի օգնում այս խնդիրը լուծելու հարցում: Բոլորը խոսում են ինչ-որ նախագծերի մասին, բոլորը խոսում են ինչ-որ գումարների մասին: Այսօր, այս մարդիկ շուրջ 30 տարի ապրում են նման պայմաններում: Ինձ չի հետաքրքրում՝ ինչ է ասում կառավարությունը: Ես պարզապես ուզում եմ գումար գտնել այդ մարդկանց համար: Այսքանը»,- հուզված իր խոսքն ամփոփել է Հայկ Բարսեղյանը:
Պատրաստեց՝ Վիկտորյա ԱՆԴՐԵԱՍՅԱՆԸ
