Ըստ արեւելյան բժշկության` ձմռան շրջանը համարվում է միզուղիների մաքրման շրջան: Անհրաժեշտ է հատուկ ուշադրություն դարձնել մեր օրգանիզմի հինգ կարեւոր օրգաններից` երիկամներին: Մաքրման ընթացքում անհրաժեշտ է շատ օգտագործել չրեղեն, այն պարունակում է կալիում:
Բուժող բժշկի հետ խորհրդակցելով՝ կարող եք այդ օրգանները մաքրել բնական միջոցներով: Երիկամային եւ լեղապարկի քարերի դեմ խորհուրդ է տրվում օգտագործել հետեւյալ դեղամիջոցը. 1 բաժակ կանեփի սերմերը մսաղացով աղալ, խառնել 3 բաժակ հում կաթի հետ, եռացնել մարմանդ կրակի վրա, մինչեւ կմնա մեկ բաժակի չափ։ Տաք վիճակում քամել եւ խմել անոթի, օրը 1 բաժակ, 5 օր շարունակ։ 10 օր հետո կուրսը կրկնել։ Դեղամիջոցն օգտագործելու ընթացքում կծու ուտեստներ չընդունել։ Հնարավոր է, որ լյարդում ցավերը սրվեն, բայց պետք է դիմանալ։
Երիկամների մաքրման համար բուսաբույժները, բացի եգիպտացորենի մազիկների, մասուրի թուրմից, առաջարկում են հետեւյալ միջոցը. 20-25 գրամ բրգաձեւ սոճու յուղ, 50-ական գրամ սուսամբար, եղեսպակ, մեղվախոտ, հնդկացորեն, արեւքուրիկ։ Խոտաբույսերի այս փունջը մանրել թեյախոտի նման։ Շաբաթվա 6 օրն առաջարկվում է հումակերություն` գումարած խոտաբույսերով ու մեղրով թեյ։ 7-րդ օրը ուտելուց 30 րոպե առաջ պատրաստել խոտերից սարքած թուրմ, հովացնել, վրան ավելացնել 5 կաթիլ սոճայուղ, լավ խառնել եւ ձողիկով խմել (չփչացնելու համար ատամները)։ Սոճայուղով թուրմը ընդունել ուտելուց առաջ։ Տեւողությունը 5 օր է։ Մաքրման ընթացքում մեզը մգանում է, որի մեջ կարող են քարեր լինել։
Երիկամային քարերի դեմ օգտագործել հետեւյալ դեղամիջոցը. 15:15:15 գրամ լոբու պատիճները, հապալասի տերեւները, հազարատերեւուկի խոտը, 20:20 գրամ դաշտային ձիաձետն ու արեւքուրիկը խառնել իրար, 1 ճաշի գդալ զանգվածի վրա լցնել 1 բաժակ սառը ջուր, թրմել 6 ժամ։ Ապա 10 րոպե եփել մարմանդ կրակի վրա, քամել եւ օրվա ընթացքում խմել 3 անգամ՝ 60-ական միլիգրամ չափաբաժնով։
Կարդացեք նաև
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
23.02.2016
