Փետրվարի 15-ի երեկոյան ծեծի ենթարկված ԼԳԲՏ ակտիվիստները փողոցում չեն համբուրվել եւ իրար ձեռք չեն բռնել: Հանրային տեղեկատվության եւ գիտելիքի կարիք ՀԿ գործադիր տնօրեն Մամիկոն Հովսեփյանը «Մեդիա կենտրոնում» նշեց, որ ակտիվիստներն ուղղակի քայլելիս են եղել եւ որեւէ տեսարան չի եղել, որը կարող է զայրացնել հասարակությանը:
«Այդ շոկային օրը որեւէ տեղ չեն դիմել: Հաջորդ օրը, երբ եկան մեր գրասենյակ, մենք առաջարկեցինք անպայման դիմել բուժհաստատություն, որը գտնվում է Բժշկական համալսարանից վերեւ: Բուժհաստատությունում բավականին խտրական են վերաբերվել, սկսել են ծաղրանքի ենթարկել, նվաստացնել: Մեր աշխատակցին, որն ուղեկցում էր նրան, չեն թողել մտնել: Ծաղրանքների փուլից հետո ասել են, որ եթե գլուխդ նկարենք կամ որովայնդ ստուգենք, պետք է վճարես: Նա գումար չի ունեցել եւ հրաժարվել է»,- տեղեկացրեց Մամիկոն Հովսեփյանը:
Բուժհաստատությունում ակտիվիստին նաեւ ասել են, որ եթե գումար չունի՝ կարող է անվճար անալիզ տալ. «Ասել են՝ կարող ես արյան անալիզ տալ, ստուգենք տեսնենք ինչ շեղումներ ունես: Այստեղ ակնհայտ ատելության խոսքով համեմված, ծաղրանքներով մարդուն փորձել են նվաստացնել: Դրանից հետո անմիջապես դիմեցինք ոստիկանություն, արդեն ես ուղեկցեցի: Այնտեղ փորձեցին համեմատաբար ավելի կիրթ գտնվել: Թեթեւ քմծիծաղներին սովոր ենք, բայց ոնց որ ամեն ինչ նորմալ ընթացավ: Ուղղակի ձգձգվում է գործը: Այժմ վկաների բացատրություն տալու փուլն է ընթանում»:
«Նոր սերունդ» մարդասիրական ՀԿ-ի նախագահ Սերգեյ Գաբրիելյանն էլ ասաց, որ Հայաստանի հասարակության շրջանում գնալով սերմանվում է խտրական դրսեւորումը խոցելի խմբերի, հատկապես՝ նույնասեռական անձանց հանդեպ: «Դա մեր, այսպես ասած, ռազմավարական գործընկեր Ռուսաստանից վերցված օրենքների վերաձեւակերպումն ու ներդրումն է: Միանշանակ բացասական է այն, ինչ կատարվում է հասարակությունում»:
Կարդացեք նաև
Սերգեյ Գաբրիելյանը նշեց, որ այդ երեւույթը չի տեղավորվում որեւէ միջազգային եւ տեղական իրավական ակտերում. «ՀՀ-ն վավերացրել է բազմաթիվ միջպետական եւ տեղական շատ օրենքներ, որով պաշտպանվում է հասարակությունը ու մարդը: Այս երեւույթը կշարունակվի այնքան, քանի դեռ Հայաստանը չի ընդունի հակախտրականության մասին օրենքը»:
Աշոտ ԻՍՐԱԵԼՅԱՆ
Լուսանկարը` PHOTOLUR-ի
