«Այսօր ամբողջ ժողովուրդն ուղղակի ճկռում է էլեկտրաէներգիայի հաշիվների տակ: Մեր հաշվարկները ցույց են տալիս, որ, օրինակ, եթե 2012-ին 1 ամսվա աշխատավարձով հնարավոր էր գնել 3772 կվտ/ժամ, ապա 2015-ին՝ 3365 կվտ ժամ, սպառողի համար վիճակը վատանում է: Տպավորություն է, որ դուք ձեր առաքելությանը հավատարիմ չեք: Ըստ նրա, հանրային ծառայություններ մատուցող ընկերությունների բոլոր հայտերը բավարարում է, իսկ սպառողը չի կարողանում հայտ ներկայացնել: Սպառողն էլ ցույց է անում, մասսայական հայտ է ներկայացնում, որ դժգոհ է, ինչպես եղավ անցյալ տարի»,- այսօր ԱԺ նիստում Հանրային ծառայությունները կարգավորող հանձնաժողովի նախագահ Ռոբերտ Նազարյանին ասաց ՀԱԿ խմբակցության ղեկավար Լեւոն Զուրաբյանը:
Ռոբերտ Նազարյանը ժողովրդի «ճկռալու» մասին պատասխանեց, որ եթե համեմատում ենք 5-7 տարի առաջվա հետ, պարզ է, որ այսօր ավելի շատ ենք վճարում, մեր գրպանից ավելի շատ գումար է դուրս գալիս: Բայց նա չհամաձայնեց, որ իրենց գործառույթները լավ չեն իրականացնում. «Դուք լավ գիտեք մարդկանց ախորժակները, որոնք հայտեր են ներկայացնում, սակագնի հետ շոշափելի տարբերություն է լինում»:
Ռոբերտ Նազարյանը Զուրաբյանին հրավիրեց, որ միասին քննարկեն, ցույց տա իրեն այն տեղը, որտեղ ռեզերվ է տեսնում, սակագինը իջեցնեն:
Զուրաբյանը հրավերն ընդունեց:
Կարդացեք նաև
Ռոբերտ Նազարյանը պատգամավորներին բացատրեց, որ ռեզերվը հասկանալի է, բայց ՀԷՑ-ը պետք է նաեւ իրենց սահմանած որակին համապատասխան ծառայություն կարողանա մատուցել, ներդրումներ անել՝ լարումը նորմալ լինի, 4 ժամից ավելի իրավունք չունի հոսանքազրկել եւ այլն: Ըստ Նազարյանի՝ եթե իրենց մնա՝ 20 անգամ ավելի շատ ներդրում կանեն, բայց իրենց թողնող չկա, դա սակագնի վրա կանդրադառնա:
Հռիփսիմե ՋԵԲԵՋՅԱՆ
