Թուրքիայի Քարաբուք շրջանում երկու ադրբեջանուհի խաբեության միջոցով 10.000 լիրա (10.03.2016թ. դրությամբ 10.000 լիրան կազմում է 3457 ԱՄՆ դոլար,-խմբ.) են շորթել Թուրքիայի 88-ամյա քաղաքացուց։ Այս մասին հաղորդում է թուրքական «Հաբերլեր» լրատվական գործակալությունը։
Ադրբեջանցի 55-ամյա Նատալյա Մ.-ն և նրա բարեկամ 43-ամյա Սամիրա Բ.-ն ամուսնության խոստումներ են տվել Թուրքիայի 88-ամյա մի քաղաքացու, այդպիսով շահել նրա վստահությունն ու շորթել 10.000 լիրա։
Ոստիկանության ձեռնարկած գործողությունների արդյունքում կանայք հայտնաբերվել և ձերբակալվել են, ինչից հետո պարզ է դարձել, որ 2 ադրբեջանուհիները նույն՝ ամուսնության խոստումներով խոշոր չափի գումարներ են շորթել Անկարայում, Չորումում, Իզմիրում և Թուրքիայի մի շարք այլ վայրերում։ Խարդախության մեջ մեղադրվող կանայք, սակայն, չեն ընդունում իրենց ուղղված մեղադրանքները՝ ասելով. «Նրանց երեխաները մոլորեցնում են մարդուն, լարում են մեր դեմ»։
