Ազգային ժողովի նախագահ Գալուստ Սահակյանի առողջական վիճակն արդեն բավարար է: Առաջիկա քառօրյա նիստերն էլ ինքն է վարելու: Այսօր խորհրդարանում լրագրողների հետ զրույցում այս մասին ասաց պարոն Սահակյանը:
Ի պատասխան լրագրողների հարցերի՝ պարոն Սահակյանն ասաց, որ ընդհանուր առմամբ տեղյակ է Ընտրական օրենսգրքի նախագծից, դրանց շուրջ ընթացող քննարկումներից: «Լրագրողների մասին, իհարկե, մենք էլ ենք շատ մտածել, կարծեմ հիմա 8 հոգի է գրված, որովհետեւ Հայաստանում այնպիսի ընտրատեղամաս չկա, որ 30-100 լրագրող տեղավորվեն: Եթե լրագրողները ճիշտ բան կառաջարկեն, դա կընդունվի մեր կողմից»,- ասաց ԱԺ նախագահը՝ արձագանքելով տեղամասերում լրագրողների թվի սահմանափակման մասին հարցին:
Լրագրողներից մեկը հետաքրքրվեց՝ արդյոք դա արհեստական մտածված դրույթ չէ՞, քանի որ իշխանությունները հակված են միայն այդ դրույթը փոփոխելու: ԱԺ նախագահն ասաց՝ չի կարծում, թե նման բան կա, վկայակոչելով այն, որ ընտրատեղամասերը փոքր են եւ հնարավոր չէ այդ տարածքներում շատ մարդկանց ներկայություն ապահովել: «Եթե դուք ինչ-որ նոր բան գծեք, ենթադրենք՝ հերթով մտնելու կամ ինչ-որ նախագիծ ունեք, մեր կողմից կընդունվի»:
Քվեարկածների ցուցակների հրապարակման դրույթի վերաբերյալ էլ ԱԺ նախագահը նկատեց. «Ես այդ դրույթի մեջ էդպես ճիշտ բան չեմ տեսնում (նկատի ունի ցուցակների հրապարակումը), բայց, դե թող առաջարկեն: Կփորձենք ինչ-որ ձեւով պատասխանել»:
Կարդացեք նաև
Լրագրողները հետաքրքրվեցին նաեւ հանրապետական պատգամավորներ Առաքել Մովսիսյանի եւ Կարեն Ավագյանի վարքով: Հիշեցնենք՝ վերջին քառօրյայի ժամանակ նրանք լեզվակռիվ ունեցան ընդդիմադիր պատգամավոր Նիկոլ Փաշինյանի հետ: Դիտարկմանը, որ հատկապես հանրապետական պատգամավորներն են նման վարքով աչքի ընկնում, Գալուստ Սահակյանն ասաց. «Աշխարհի բոլոր պառլամենտներն են այդպես, մերն, ըստ երեւույթին, մի քիչ ավելի լավն է այդ տեսանկյունից: Նիստերի ժամանակ, իհարկե, հայհոյանքներ էլ են լինում, մարդ էլ են փորձում ինչ-որ բան անել… (պարոն Սահակյանը չմանրամասնեց ինչ են փորձում անել- Ն. Գ.), պառլամենտական օրենքներն են»:
Այլ մանրամասները՝ քիչ ուշ, տեսանյութում:
Նելլի ԳՐԻԳՈՐՅԱՆ
