Հայաստանի նոր քաղաքական մշակույթ կուսակցության նախագահ Անի Զախարյանն այսօր Ընտրական նոր օրենսգրքի թեմայով ԱԺ լսումների ժամանակ դժգոհեց՝ եթե կուսակցությունը 20-30 առողջ կադրային բազա ունի, այդ 80 շեմը խիստ սահմանափակում է այդպիսի առողջ ներուժ ունեցող ուժերին մասնակցել ընտրություններին. «Կան այսօր ԱԺ-ում 20-25 տարվա կուսակցություններ, սակայն 4-5 հոգով են ներկայացված ԱԺ-ում»:
Դավիթ Հարությունյանը պատասխանեց, որ ընտրական շեմը պատահական չէ, եթե այդ շեմը չլիներ, կարող էին ԱԺ-ում հայտնվել կուսակցություններ՝ մեկ պատգամավորով. «Բազում երկրներում մեխանիզմներ են ստեղծում, որ փոքր կուսակցությունները միավորվեն: Ողջամիտ պահանջները կուսակցության հնարավորությունների վերաբերյալ ընդունելի են: Կուսակցությունները կարող են առաջարկել նաեւ ոչ կուսակցության անդամի: Այն մասին՝ ուժը առողջ , թե ոչ, տեղ ունի՞ խորհրդարանում, պետք է որոշի ժողովուրդը, մեր խնդիրն է Ընտրական օրենսգրքով ապահովել, որ այդ կամքը լինի պատշաճ»:
Խոսքի ազատության պաշտպանության կոմիտեի նախագահ Աշոտ Մելիքյանը հարցրեց՝ դիտորդներին լրագրողներից անջատելու առաջարկ էին ներկայացրել, դա ընդունվե՞լ է:
Կարդացեք նաև
Դավիթ Հարությունյանը պատասխանեց, որ եթե հաջող ձեւակերպումներ լինեն՝ դեմ չեն, որ դրանք տեղ գտնեն օրենսգրքում:
Պարոն Մելիքյանը նաեւ առաջարկեց, որ դիտորդ դառնալու համար մեղմացնեն պայմանները, որ մարդիկ չգնան այդ կեղծման ճանապարհով եւ իրենց լրագրողի տեղ չդնեն:
Դավիթ Հարությունյանը պատասխանեց, որ դիտորդների համար քննությամբ գոնե տառաճանաչների են վերցնում. «Քննական համակարգը շատ պարզ է: Ճիշտ է, որ գոնե տառաճանաչությունը ստուգվի: Այդ քննությունը չեն կարողանում տալ այն մարդիկ, որոնք տառաճանաչ չեն»:
Հռիփսիմե ՋԵԲԵՋՅԱՆ
