Այսօր «օֆշորի» գործով դատական նիստին Էրեբունի եւ Նուբարաշեն վարչական շրջանների ընդհանուր իրավասության դատարանում խաբեության եւ փողերի լվացման մեջ մեղադրվող Աշոտ Սուքիասյանը ցուցմունք տվեց:
Նա բոլորովին այլ կերպ ներկայացրեց իր եւ տուժող Փայլակ Հայրապետյանի ծանոթությունը, հանդիպումը:
Փայլակ Հայրապետյանը պատմում էր, որ կառավարական ժողովին Աշոտ Սուքիասյանն ընդմիջմանը մոտեցել է իրեն ու խնդրել համագործակցել:
Կարդացեք նաև
Իսկ Աշոտ Սուքիասյանը պատմեց, թե ինչպես է Փայլակ Հայրապետյանն անընդհատ մարդ ուղարկել՝ Սասուն Նազարյանին, խնդրել, որ իր հետ գործ անի, բիզնես սկսի ու կառավարական ժողովին էլ Փայլակ Հայրապետյանն է մոտեցել իրեն «Ասեց՝ տղա ջան, ինչի՞ ես Սասուն Նազարյանին մերժում: Ասեց՝ կարո՞ղ ենք հանդիպել, ես քո մասին շատ լավ բաներ եմ լսել, տեղյակ եմ ով ես, ինչ գործեր ես արել»:
Փայլակ Հայրապետյանն անընդհատ տեղից ասում էր՝ «Սո՛ւտ ա ասում, չե՞ս ամաչում, լրիվ սուտ ա»:
Աշոտ Սուքիասյանի ներկայացմամբ՝ Փայլակ Հայրապետյանն է հատուկ պլանավորված այդ ժողովին իրեն մոտեցել. «Ես հետագայում իմացա, որ էդ ժողովին իրեն չէին հրավիրել, իր նախաձեռնությամբ էր եկել: Հայրապետյանն ասաց, թե ինչպես է 8 տարի առաջ տղային կորցրել, տղայի արձանն է կառուցել, ասեց, որ շենքեր ունի, տարբերակներ մտածենք համագործակցելու: Ասաց՝ շենքերի հետ փոխանակում անենք, ասեցի՝ բացառվում է»:
Հետո պատմեց, թե ինչպես է իր գլխին դժբախտութուններ եկել, մահացել է հայրը, մայրը, տղայի հետ է դժբախտ դեպք պատահել ու այդ ամբողջ ընթացքում Փայլակ Հայրապետյանն ամենամտերիմ ընկերոջ պես իր կողքին է կանգնել, փարատել վիշտը. «3-րդ հարկից տղայիս գցել էին՝ սպանելու նպատակով, իհարկե: Ամբողջ մարմինը փշուր-փշուր էր եղած, Աստված կյանքը փրկեց: Հայրապետյանը գիշեր-ցերեկ մոտս էր: Հայրս հանկարծամահ եղավ, շատ ծանր վիճակի մեջ էի, հորս հետ շատ կապված էի: Էդ վիշտը չմոռացած՝ մայրս մահացավ, մի շաբաթվա մեջ տարօրինակ հիվանդությամբ հիվանդացավ ու մահացավ: Հայրապետյանը հաճախ գալիս, մխիթարում էր եւ ես հոգուս պարտքը համարեցի Հայրապետյանին օգտակար լինել: Ինքն էլ ասում էր՝ տղա ջան, մենակ դու ինձ կարող ես օգնել, բարեկամներս ինձնից երես են թեքել, ասում են՝ դու միֆ ես, փուչիկ ես եւ այլն»:
Ավելի ուշ Aravot.am-ի հետ զրույցում Փայլակ Հայրապետյանն ասաց, որ այն, ինչ պատմեց Աշոտ Սուքիասյանն, ամբողջովին հորինված է, ոչ մի նման բան չի եղել:
Հռիփսիմե ՋԵԲԵՋՅԱՆ
