«Եթե Իլհամ Ալիեւը խրախուսում է հայ զինվորներին խոշտանգողներին ու գլխատողներին, դա խոսում է այն մասին, որ ինքը չի կարող մարդ անվանվել, էլ չեմ ասում՝ որպես Ադրբեջանի նախագահ: Նա վարկաբեկում է իր պետությունն ու այդ ժողովուրդը, որովհետեւ ամբողջ աշխարհում գիտեն՝ ով է հերոս, ով՝ չէ: Մարդը, որը գլուխ է կտրում, չի կարող հերոս լինել եւ ընդհանրապես մարդ չի կարող լինել»,- մեզ հետ զրույցում ասաց ՊՆ նախկին նախարար Վաղարշակ Հարությունյանը:
Հիշեցնենք, որ քառօրյա պատերազմում հերոսացած զինվոր Քյարամ Սլոյանին գլխատողին Իլհամ Ալիեւը պարգեւատրել է: Պարգևատրումը երևում է ադրբեջանական Haqqin.az-ի հրապարակած լուսանկարներում:
ՊՆ նախկին նախարարը վստահեցնում է. «Մենք ամեն ինչ անում ենք, ապրիլյան դեպքերից հետո ե՛ւ ԵԽ-ում, ե՛ւ այլ կառույցներում, որոնք հռչակում են մարդու իրավունքներ, մարդկային բարձր արժեքներ, բայց երբեք այդ գործողություններին համարժեք գնահատական չեն տալիս:
Այնպես որ, այստեղ մեր խնդիրը չէ, խնդիրն ավելի գլոբալ է, գլոբալ է այն առումով՝ եթե միջազգային հանրությունը ժամանակին գնահատականը ճիշտ տար, ապա Ալիեւը նման բաներ չէր անի: Մյուս կողմից մենք գիտենք՝ ինչ դաշինք է դա՝ Ադրբեջան-Թուրքիա, այդ դաշինքում այդպիսի մոտեցումը խրախուսվում է ու դարձել է պետության քաղաքականություն. նույնը կատարվում է Թուրքիայում քրդերի հանդեպ, նույն ցեղասպանությունն է այսօր իրականացվում, եւ որեւէ գնահատական դրան չի տրվում»:
Կարդացեք նաև
Արփինե ՍԻՄՈՆՅԱՆ
