Թուրքիայի վարչապետ Ահմեդ Դավութօղլուի հրաժարականի պատմությունը սկսվել է մայիսի 4-ին, երբ վերջինս հրավիրվեց նախագահական եւ անակնկալ հանդիպում ունեցավ Թուրքիայի նախագահ Ռեջեփ Թայիփ Էրդողանի հետ:
«Անակնկալ էր, որովհետեւ հանդիպումն իրականում նշանակված էր մայիսի 5-ին: Էրդողանի ցանկությամբ հանդիպումը կայացավ մեկ օր առաջ, իսկ արդեն հաջորդ օրը ոչ մի հայտարարություն չարվեց հանդիպման մասին, մինչդեռ քաղաքական շրջանակները եւ մամուլը սպասում էին, որ Դավութօղլուի հրաժարականի մասին հայտարարություն կլինի:
Հաջորդ օրը Դավութօղլուն կրկին չխոսեց հրաժարականի մասին, ասաց, որ «Արդարություն եւ զարգացում» կուսակցության նիստ է գումարվել, իսկ մայիսի 22-ին սպասվում է արտակարգ նիստը, իսկ ինքը չի առաջադրվի որպես կուսակցության նախագահ: Թուրքիայում խորհրդարանական համակարգ է եւ ընտրություններից հետո հաղթող կուսակցության նախագահին է հանձնարարվում վարչապետի պաշտոնը»,-մայիսի 10-ին «Զարկերակ» մամուլի ակումբում, խոսելով Դավութօղլուի մոտալուտ հրաժարականի մասին՝ ասաց թուրքագետ Հակոբ Չաքրյանը:
Նրա բնորոշմամբ` Թուրքիայի նախագահ Ռեջեփ Թայիփ Էրդողանը Դավութօղլուին հրահանգել է չհայտարարել հրաժարականի մասին, որպեսզի չշահարկվի տեղեկությունը, թե իշխող կուսակցության ներսում անհամաձայնություններ կան, այդ պատճառով էլ որոշվել է առաջիկայում սպասվող արտակարգ համագումարի ընթացքում «փափուկ անցում» կատարել Թուրքիայի վարչապետի հրաժարականի թեմային:
Կարդացեք նաև
Իսկ թե ինչով է պայմանավորված Էրդողանի` Դավութօղլուին ասպարեզից հեռացնելու որոշումը, թուրքագետը տեղեկացրեց, որ Թուրքիայի քաղաքական շրջանակներում բարձրաձայնվում է հետեւյալ տեսակետը. Դավութօղլուն չկարողացավ ըստ պատշաճի պայքարել, որպեսզի Թուրքիան անցնի կառավարման նախագահական համակարգի, որն Էրդողանի միանձնյա իշխանությունն օրինականացնելու լավագույն միջոցն է:
«Մեկ այլ պատճառ էլ կա: Տարածաշրջանում Թուրքիայի արտաքին քաղաքականությունը ձախողվել է, հատկապես` Սիրիայի հարցում, որի դեպքում Թուրքիայի քաղաքականությունը խայտառակություն է: Լարված են նաեւ Թուրքիա-ԱՄՆ հարաբերությունները, իսկ Ռուսաստանի դեպքում վերջինիս կործանիչը խոցելուց հետո ճգնաժամային իրավիճակ է: Այսինքն, Թուրքիան մեկուսացել է արեւմտյան եւ տարածաշրջանային դաշնակիցներից»,-նշեց Հակոբ Չաքրյանը:
Նա նկատեց, որ թուրք-քրդական բախումներն ավելի են սրում Թուրքիայի ներքին խնդիրները: Բախումների հետեւանքով մինչ օրս զոհվել է մոտ 450 քուրդ-զինյալ, վիրավորվել` 3000-ը, իսկ քրդաբնակ շրջաններից արտագաղթել է մոտ 300.000 մարդ: «Այդ պետությունը հրանոթներով եւ ինքնաթիռներով հրթիռակոծում է իր քաղաքները միայն այն պատճառով, որ դրանք քրդաբնակ են»: Չաքրյանի խոսքով` Սիրիայի նախագահ Բաշար Ասադին իշխանությունից հեռացնելու թուրքական ծրագիրը ձախողվել է, եւ ընդհանուր առմամբ, տարածաշրջանի երկրները երես են թեքել Թուրքիայից. «Այս ձախողումները հաշվի առնելով` Էրդողանը Դավութօղլուին պարտադրում է հեռանալ, որպեսզի այս ամենի մեղքը բարդի նրա վրա»:
Լուիզա ՍՈՒՔԻԱՍՅԱՆ
