«Թուրքիայի վարչապետ Ահմեդ Դավութօղլուի մոտալուտ հրաժարականի ֆոնին երկրի նախագահ Ռեջեփ Թայիփ Էրդողանին ձեռնտու է, որպեսզի նոր վարչապետը լինի իր կամակատարը»,-ասում է թուրքագետ Հակոբ Չաքրյանը: Մայիսի 10-ին «Զարկերակ» մամուլի ակումբում, խոսելով Թուրքիայի վարչապետի պաշտոնի հավակնորդների մասին, նա նշեց, որ շրջանառվում է Տրանսպորտի նախարարի` Բինալի Յըլդըրըմի որդու անունը: Սակայն լրատվամիջոցները հրապարակել էին լուսանկար, որում պաշտոնյանի որդին թղթախաղով է զբաղված. «Թերթերը գրեցին, որ նա 150 միլիարդ դոլարի ունեցվածքի տեր է եւ 34 նավ ունի, նաեւ նավահանգիստներ` Մայամիում, Պանամայում, Էկվադորում: Այսքանից հետո չեմ կարծում, որ նրան վարչապետ նշանակեն»,-նկատեց Հակոբ Չաքրյանը:
Նրա խոսքով` մյուս թեկնածուն Բերաթ Ալբայրաքն է` Էրդողանի ավագ դստեր ամուսինը, որը նաեւ Էներգետիկայի եւ բնական պաշարների նախարարն է. «Կարծում եմ` Էրդողանի համար ձեռնտու կլինի նրան նշանակել վարչապետ, հետո ազատելու դեպքում խնդիրներ չի ունենա»:
Չաքրյանի դիտարկմամբ` Թուրքիայի նոր վարչապետի նշանակումով հայ-թուրքական հարաբերություններում տեղաշարժեր չեն լինի. «Նախեւառաջ, Թուրքիան պետք է հրաժարվի Ադրբեջանի դիրքերը ամրապնդելուց, նաեւ Հարավային Կովկասն իր ազդեցության տակ վերցնելու եւ Մեղրին Ադրբեջանին «կցելու» նկրտումներից»:
Կարդացեք նաև
Լուիզա ՍՈՒՔԻԱՍՅԱՆ
