Մաշտոցի Մատենադարանը եւ Ռազմավարական եւ ազգային հետազոտությունների հայկական կենտրոնը նախաձեռնել են ակադեմիկոս Ռիչարդ Գ. Հովհաննիսյանի «Հայաստանի Հանրապետություն. Լոնդոնից Սեւր, փետրվար-օգոստոս, 1920» եւ «Հայաստանի Հանրապետություն. Սալի եւ մանգաղի միջեւ. Մասնատում եւ խորհրդայնացում» «Հայաստանի Հանրապետություն» շարքի 3-րդ եւ 4-րդ հատորների հայերեն թարգմանության շնորհանդեսը, որը կայացավ մայիսի 24-ին՝ Մատենադարանում:
Միջոցառումը բացեց Ռիչարդ Հովհաննիսյանի որդին՝ «Ժառանգություն» կուսակցության առաջնորդ Րաֆֆի Հովհաննիսյանը՝ «Ամենայն տեղ մահը մի է, Մարդ մի անգամ պիտ մեռնի, Բայց երանի՝ որ յուր ազգի Ազատության կզոհվի» տողերով:
Նա նշեց, որ շատ է ցանկանում, որ հայերենին տիրապետող ամեն ոք կարդա ու իմանա Հայոց պատմությունը:
Կարդացեք նաև
Պարոն Հովհաննիսյանը նաեւ նկատեց, որ իր քաղաքական գործունեության հետեւանքով պատմաբան Ռիչարդ Հովհաննիսյանի աշխատանքը պատմագրության մեջ պետական մակարդակով այն ընկալումը չունի, ինչը նա իսկապես վաստակել է: Նրա ձեւակերպմամբ. «Թեեւ հայրիկը որեւէ շքանշանի կարիքը չունի, բայց դա փոխհատուցվում է ժողովրդի սիրով»:
Րաֆֆի Հովհաննիսյանը շեշտեց, որ պետք է անցյալից դասեր քաղեինք, մինչդեռ այսօր էլ ունենք մարդկային եւ տարածքային մեծ կորուստներ:
Գոհար ՀԱԿՈԲՅԱՆ
