Քիչ հավանական է, որ հունիսի 2-ին Գերմանիայի Բունդեսթագում Հայոց ցեղասպանության մասին բանաձև կընդունվի:
«Հայելի» ակումբում լրագրողների հետ հանդիպմանը ԵՊՀ արևելագիտության ֆակուլտետի փոխդեկան, թուրքագետ Ռուբեն Մելքոնյանը քննարկման ենթակա այս բանաձևում որոշ կարևոր դրույթներ առանձնացրեց. «Բանաձևի ձևակերպումը մի հետաքրքիր տարր է պարունակում. շեշտվում է, թե 101 տարի առաջ Օսմանյան կայսրությունում տեղի ունեցածը Ցեղասպանություն է: Սա հետաքրքիր ուղերձ է առ այն, որ Ցեղասպանության 101-րդ տարելիցից հետո էլ ցեղասպանության ընկալման գործընթացները միջազգային հանրության մեջ տարածվում են»:
Ռուբեն Մելքոնյանը նկատեց նաև, որ ինչ-որ առումով ստվերվում է Հայոց ցեղասպանությունը, քանի որ բանաձևում ընդհանրական ձևակերպում կա հայերի և մյուս քրիստոնյաների նկատմամբ իրականացված ցեղասպանության, բայց, միևնույն է, շեշտադրումները դրական են:
Ըստ թուրքագետի` այն, որ Բունդեսթագում կա մոտ 630 խորհրդական, դա բարդացնում է բանաձևի քննարկումը, քանի որ առաջ են գալիս քաղաքական շահերը, որոնք շատ հաճախ գերադասվում են բարոյականին:
Կարդացեք նաև
Անդրադառնալով թուրքական արձագանքներին` պարոն Մելքոնյանը դրանք «ստանդարտ» որակեց ու փաստեց, որ «սա թուրքական արտաքին քաղաքականությանը նետված մարտահրավեր է՝ արտաքին քաղաքականության ճարտարապետ Դավութօղլուի հեռանալուց հետո»:
Բանաձևի ընդունման մյուս խոչընդոտը թուրք-գերմանական հարաբերություններն են: Թուրքագետն այս առիթով նշեց. «Գերմանիայում կա հզոր թուրքական համայնք, որի ներկայացուցիչներից շատերը Գերմանիայի քաղաքացիներ են՝ ընդգրկված տարբեր ոլորտներում, ուստի բանաձևի ընդունումը էականորեն կարող է վնասել այդ հարաբերությունները»:
Եզրափակելով` Ռուբեն Մելքոնյանը հայտնեց, որ եթե բանաձևը չընդունվի էլ, այն կբերի դրական ալիք՝ միջազգային մամուլում Ցեղասպանության հարցի քննարկման ոլորտում, մյուս կողմից այս բանաձևը ԵՄ-ի կողմից ուղերձ կարող է լինել Թուրքիային՝ նրա նկրտումները զսպելու տեսանկյունից:
Տաթև ՀԱՐՈՒԹՅՈՒՆՅԱՆ
