Տնտեսագետ Վահագն Խաչատրյանի համոզմամբ՝ էլեկտրաէներգիայի և գազի սակագնի իջեցումն ավելի շատ կապված է նախընտրական տարվա հետ: Ըստ նրա՝ 2,58 դրամն այն առավելագույն չափը չէ, որ պետք է նվազեր էլեկտրաէներգիասակագինը:
Նշենք, որ օգոստոսի 1-ից էլեկտրաէներգիայի սակագինը 48,78 դրամից դառնալու է 46,2 դրամ. սակագինը նվազելու է 2,58 դրամով: «Մեդիա կենտրոնում» հրավիրված քննարկմանը պարոն Խաչատրյանն այս առիթով նկատեց. «Տնտեսության վրա առանձնապես մեծ ազդեցություն չի ունենալու. մոտ ութ միլիոն դրամի տնտեսում, իսկ ամեն ընտանիքի համար ամսական խնայողությունը կլինի 680-700 դրամ»:
Տնտեսագետ Վիլեն Խաչատրյանը, հաշվի առնելով այն հանգամանքը, որ հնարավոր է օգոստոսից սուբսիդավորումը կառավարությունը դադարեցնի, փաստեց. «Ըստ էության, մենք ունենք սակագնի բարձրացում: Եթե օգոստոսի 1-ից սուբսիդավորումը վերանում է, ստացվում է, որ ունենք սակագնի բարձրացում»:
Տնտեսագետները մտահոգություն հայտնեցին, որ ներդրումների անվան տակ թույլ չեն տալիս, որ էլեկտրաէներգիայի սակագնի ավելի մեծ նվազեցում տեղի ունենա: Ըստ Վիլեն Խաչատրյանի՝ 2,5 դրամի նվազեցումը կոմպրոմիսային թիվ է, ոչ թե այն չափը, որով իսկապես կարող էին իջեցնել սակագինը: Տնտեսագետը նաև իրատեսական չի համարում այն, որ էլեկտրաէներգիայի սակագինը կարող է ևս մեկ անգամ նվազեցվել:
Կարդացեք նաև
ՀՊՏՀ տնտեսության կարգավորման և միջազգային տնտեսական հարաբերությունների ֆակուլտետի դեկան Ատոմ Մարգարյանը հիշեցրեց, որ 24 միլիարդի պարտքը, որը ձևավորվել էր փնթի աշխատանքի պատճառով՝ կոպեկ առ կոպեկ փակեց բնակչությունը: Պարոն Մարգարյանը մտահոգություն հայտնեց, որ մեզանում էլեկտրաէներգետիկայի ոլորտը հնացած մեթոդներով է կարգավորվում, այնինչ նույնիսկ Ղրղզստանն է հրաժարվել այս մեթոդներից. «Անգամ Բելառուսում կորուստները կազմում են 8-9%, իսկ մեզ մոտ աննախադեպ ցուցանիշ է՝ 12-13%»:
Ատոմ Մարգարյանը նշեց. «Ոչ ոք չի ասել, որ սուբսիդավորման մեխանիզմը կհանվի, ուստի սուբսիդավորման ծավալի ինչ-որ տարրեր կպահպանվեն, եթե ոչ հիմա, ապա աշնանը նման որոշումներ պիտի որ կայացվեն»:
Վահագն Խաչատրյանը փաստեց, որ երբ ժամանակին ուզում էին հասկանալ, թե գազի գինն ինչպես է հաշվվում, այն ժամանակ նույնիսկ վարչապետի մակարդակով պարզաբանել են, թե գազի գնի հիմքում դրվում է Օրենբուրգ քաղաքի գազի գինը, որտեղ սակագինը 50-60 դոլար է: Այս հանգամանքը հաշվի առնելով՝ պարոն Խաչատրյանը հայտարարեց. «Գազի սակագինը պետք է մեզ մոտ լինի 90-100 դոլար»:
Դառնալով անցյալ տարի հունիսին բռնկված «Electric Yerevan» պայքարին, պարոն Խաչատրյանն այսպիսի կարծիք հայտնեց. «Այդ պայքարի իմաստն այն էր, որ սակագինը բարձրացվեր ու հայտնվեր նոր սեփականատեր»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
