Արցախի Հանրապետության վարչապետ Արայիկ Հարությունյանը հունիսի 29-ին ընդունել է մարդասիրական առաքելության շրջանակում երկօրյա այցով Արցախ ժամանած՝ Հայաստանի մանուկներ հիմնադրամի ներկայացուցիչներին` կառույցի հիմնադիր և խորհրդի ատենապետ Գարո Արմենի գլխավորությամբ: Պատվիրակության կազմում էր նաև հիմնադրամի խորհրդական Ջոն Էվանսը:
Հանդիպմանը քննարկվել են հիմնադրամի մարդասիրական ծրագրերը կրթական և առողջապահական նպատակներով Արցախում կիրառելու հետ կապված հարցեր, որոնք նախատեսված են ուղղվելու ապրիլյան իրադարձություններից հետո գյուղերից տեղահանվածների, ինչպես նաև վիրավոր քաղաքացիների ու զինվորների բժշկական կարիքները հոգալուն:
Ողջունելով հյուրերին` վարչապետը շնորհակալություն է հայտնել Հայաստանի և Արցախի նկատմամբ նրանց կողմից ցուցաբերվող շարունակական ուշադրության համար և կարևորել հիմնադրամի կողմից գյուղական բնակավայրերում իրականացվող կրթական ու առողջապահական ծրագրերը:
«Արցախում կրթության և առողջապահության ոլորտներում պայմանների բարելավման ուղղությամբ մեծածավալ ծրագրեր են իրականացվել, սակայն որակի ապահովման համար ժամանակակից մեթոդների կիրառումն անհրաժեշտ է, ինչը դուք փորձում եք ապահովել ձեր ծրագրերի միջոցով»,- ասել է Ա. Հարությունյանը:
Կարդացեք նաև
Կառավարության ղեկավարն իր առանձնահատուկ վերաբերմունքն է արտահայտել հիմնադրամի խորհրդական Ջոն Էվանսին, ով միջազգային հարթակներում, վարչապետի բնորոշմամբ, հայ դեսպանի առաքելություն է իրականացնում: «Համոզված եմ, որ Ձեր անունն իր ուրույն տեղն է ունենալու հայոց պատմության էջերում»,- դիմելով Ջ. Էվանսին՝ ասել է վարչապետը:
Հիմնադրամի ատենապետ Գարո Արմենը, ներկայացնելով իրենց ծրագրերը, կարևորել է կառույցի հատկապես «ՍՄԱՐԹ» նախաձեռնությունը, որի նպատակն է գյուղական բնակավայրերի, ժամանակակից տեխնոլոգիաների գործածության միջոցով, առաջխաղացման ապահովումը: Երկկողմանի պայմանավորվածություն է ձեռք բերվել այն` որպես պիլոտային ծրագիր, Արցախում կյանքի կոչելու ուղղությամբ: Վարչապետի առաջարկությամբ` հանրապետության գյուղերում նորաբաց համայնքային կենտրոնների սենյակներից մեկը կհատկացվի անհրաժեշտ ժամանակակից տեխնիկական սարքավորումներով կահավորելու և այն նպատակային օգտագործելու համար:
Հանդիպմանը քննարկվել են նաև առողջապահության և կրթության ոլորտներում հնարավոր այլ ծրագրերի իրագործման հետ կապված մի շարք հարցեր: Կողմերը պայմանավորվել են, մասնավորապես՝ գյուղական բնակավայրերի բուժկետերի բուժքույրերի դասընթացների և դպրոցականների ամառային հանգստի կազմակերպման շուրջ:
Հանդիպմանը մասնակցում էին նաև ԱՀ կրթության, գիտության և սպորտի նախարար Սլավիկ Ասրյանը, առողջապահության նախարար Կարինե Աթայանը և կառավարության աշխատակազմի ղեկավար-նախարար Լևոն Գրիգորյանը:
ԱՀ կառավարության աշխատակազմի տեղեկատվության և հասարակայնության հետ կապերի բաժին