Ադրբեջանցի լրագրողները մի նախաձեռնություն են հեղինակել, որի նպատակն է կազմակերպել հանդիպում ադրբեջանական դիվերսիոն հետախուզական խմբի գերեվարված անդամներ Շահբազ Գուլիևի և Դիլհամ Ասկերովի հետ:
Նախաձեռնության հայտարարության մեջ ներկայացվում է, թե իբր այս երկու անձինք այցելել էին իրենց հարազատների շիրիմներին, սակայն այդ ժամանակ գերեվարվել են, ինչպես նաև կա մտահոգություն քրեակատարողական հիմնարկում նրանց նկատմամբ վատ վերաբերմունքի մասին:
Aravot.am-ի հետ զրույցում այս առիթով Արցախի մարդու իրավունքների պաշտպան (ՄԻՊ) Ռուբեն Մելիքյանը հայտարարեց, որ նախաձեռնության այս հայտարարությունը, մասնավորապես վատ վերաբերմունքի մասով, իրականությանը չի համապատասխանում. «Որպես Արցախի մարդու իրավունքների պաշտպան` կարող եմ ասել, որ որևէ վատ վերաբերմունք որևէ մեկի նկատմամբ չի իրականացվում Արցախի քրեակատարողական հիմնարկներում: Ունենք ամուր հիմքեր կարծելու, որ մեր ստացած տեղեկությունները իրականությանը համապատասխանում են»:
Պարոն Մելիքյանը չի պատկերացնում, որ այս նախաձեռնությունը կարող է իրավական հետևանքներ ունենալ: Ըստ նրա` ցանկացած երկրում էլ կարող են նման նախաձեռնություններ ծնվել, և գուցե այդ նախաձեռնության հեղինակները իրոք մտահոգ են նշված անձանցով:
Կարդացեք նաև
Պարոն Մելիքյանը փոխանցեց. «Հայտարարությանը ծանոթ եմ, և այնտեղ Արցախի վերաբերյալ որևէ միտք չկար: Կարծում եմ, որ եթե լինի դիմում Արցախի իշխանություններին, նրանք պատշաճ ձևով կքննարկեն այդ հարցը, և եթե ինձ դիմեն, ես ևս պատշաճ ձևով իմ իրավասությունների սահմանում կքննարկեմ այդ դիմումը:
Ռուբեն Մելիքյանը նշեց, որ ինչպես այլ երկրներում, այնպես էլ Արցախի ՄԻՊ-ը լիազորություններ ունի այցելել քրեակատարողական հիմնարկներ, ինչից ինքն օգտվել է:
Սակայն պարոն Մելիքյանը շեշտում է. «Չմոռանանք, որ նրանք մարդիկ են, որոնք դատապարտված են Արցախի Հանրապետության քրեական օրենսգրքով արգելված արարք կատարելու համար, Արցախի Հանրապետության դատավարությամբ սահմանված կարգով, Արցախի իրավասու դատարանի կողմից: Ցանկացած նախաձեռնություն այս դեպքում Արցախի իշխանություններին պիտի դիմի, և այն քննարկման առարկա կդառնա»:
Տաթև ՀԱՐՈՒԹՅՈՒՆՅԱՆ
