Մի խումբ քաղաքացիներ օգոստոսի 6-ին հավաքվել էին «Էրեբունի» բժշկական կենտրոնի դիմաց: Հիմնադիր խորհրդարանի անդամ Վահրամ Պետրոսյանը ներկայացրեց իրենց պահանջները: Դրանցից առաջինը հստակ տեղեկատվություն տրամադրել «Էրեբունի» բժշկական կենտրոնում բուժում ստացող «Սասնա ծռեր» խմբավորման անդամների մասին:
«Տեղեկատվության պակասը հաճախ խոսակցությունների եւ տարբեր լուրերի առիթ է տալիս: Օրինակ՝ կա տեղեկատվություն, որ Թաթուլ Թամրազյանը մինչեւ այժմ էլ գտնվում է կոմայի մեջ, չգիտենք՝ դա ճի՞շտ է, թե՞ սխալ: Ամեն դեպքում՝ նաեւ դա ճշտելու համար եկել ենք մենք այստեղ»,- ասաց նա՝ առաջարկելով բարձրանալ հիվանդանոց եւ խնդրել բժիշկներին, որպեսզի նրանք հանգամանալից ներկայացնեն յուրաքանչյուր հիվանդի վիճակը:
Վահրամ Պետրոսյանը հայտարարեց, որ Արմեն Լամբարյանի պաշտպանին արգելել են տեսակցել իր պաշտպանյալի հետ, ինչը, իր գնահատմամբ, մարդու իրավունքների կոպիտ խախտում է. ցանկացած ոք իրավունք ունի ստանալ իրավաբանական աջակցություն. «Արմեն Լաբարյանին այդ աջակցությունը ստանալուց զրկել են: Պահանջում ենք իշխանական մարմիններից թույլատրել փաստաբանի հանդիպումը Արմեն Լամբարյանի հետ»:
Քաղաքացիները մոտեցան «Էրեբունի» բժշկական կենտրոնի մուտքին եւ ներկայացրեցին իրենց պահանջները ոստիկաններին, վերջիններս առաջարկեցին նրանց սպասել իրենք կհրավիրեն համապատասխան բժիշկին, որը կպատասխանի իրենց հուզող հարցերին:
Ամի ՉԻՉԱԿՅԱՆ
